Në pamundësi të debatit fizik me qytetarët për shkak të pandemisë me COVID-19, kryetari i Komunës së Lipjanit, Imri Ahmeti, ka zgjedhur rrjetin social Facebook, për të debatuar dhe kthyer përgjigje qytetarëve lipjanas.
Kreu komunal tha se asfaltimi i rrugëve është primar për Lipjanin. Qytetari Leotrim Veseli, kërkoi përgjigje për rrugët e pa asfaltuara, në fshatin Mirenë, ku për këto të fundit, Ahmeti theksoi se do të përfundohen shumë shpejtë.
Ahmeti: Rrugët në Mirenë do të përfundojnë shpejt
“Janë në proces, e di që në Mirenë rrugët janë të pa përfunduara, por do të përfundojnë shpejtë”, deklaroi ai.
Qytetari tjetër, Burim Gashi, ishte i interesuar të di nga kryetari për investimet në shkollën e Janvevës.
E për këtë pyetje, kryetari i Lipjanit tha se ato investime tashmë kanë përfunduar.
Ahmeti: Investimet në shkollën e Janjevës kanë përfunduar
“Burim Gashit i kërkoj të shkoj ta shohë, nuk paska qenë moti në shkollë, investimet kanë përfunduar këto ditë në këtë shkollë”, tha ai.
Ndërsa, në pyetjen e qytetare Fitore B., për ndërtimin e trotuarit në Vrellë, ai tha se kompetencat për atë rrugë i bartë Ministria dhe jo Komuna.
Ahmeti: Rruga përmes fshatit Vrellë, nuk është e komunës
“Edhe Vrella e di që ka nevojë, në këtë vit jemi në projekt të ndriçimit dhe të asfaltimit atje, trotuaret nuk janë. Keni parasysh që rruga që është përmes fshatit Vrellë, nuk është e komunës është e Ministrisë dhe nuk e kemi të lehtë për të filluar ndërtimin në atë rrugë, për shkak të kompetencës që nuk është e komunës. Nuk është vetëm Vrella e Magurës, por çdo fshat kërkon trotuar dhe ndriçim, andaj ne duhet të shkojmë me rend”, tha ai.
Kurse, në pyetjen e Betim Berishës për bursat komunale, kryetari Ahmeti bëri të ditur se brenda javës studentët do të kenë mundësi të aplikojnë.
Ahmeti: Përcillni njoftimin e komunës për bursa
“Përcillni njoftimin e komunës, brenda javës do të keni mundësinë e aplikimit”, tha Ahmeti.
Të shumta ishin përgjigjet që qytetarët e Lipjanit patën mundësi t’i dëgjojnë drejtpërdrejt nga kryetari i Komunës.