(E plotësuar) - Ministrja e Kulturës, Rinisë dhe Sportit, Vlora Dumoshi, ka inspektuar sot punimet që janë duke u zhvilluar në projektin e Muzeut të Historisë së Natyrës tek Pishat e Sllatinës, i cili projekt kap vlerën e mbi 2 milionë euro.
Nga aty, ministrja Dumoshi tha se për shkak të pandemisë punimet në këtë projekt janë zhvilluar me një dinamikë të reduktuar. Ndërsa, u shpreh se ndërprerja e investimeve kapitale nga ana e qeverisë për shkak të pandemisë është një hendikep dhe ka ndikuar që shumë projekte të MKRS-së të shtyhen për vitin e ardhshëm.
Dumoshi: Punimet janë duke vazhduar
“Ne po presim janë disa specifika të cilat një raport duhet me na ardhë për objektin, kështu që, një pjesë e statikës edhe një pjesë ku këta po hasin në disa pengesa nga projekti i paraparë. Tash punimet janë duke vazhduar, kati i parë, podrumi ka përfunduar, tash etapa e dytë bëhet dhe pastaj menjëherë janë duke punuar për të filluar, se ky është një kompleks me tri ndërtesa përcjellëse. Urojmë që të kryhet në ato optimalet të cilat janë paraparë. Jam koshiente dhe e di që buxheti për këtë vit është paraparë shumë pak, diku 250 mijë euro për ndërtim, por edhe kjo faza dhe kjo situata të cilën e kemi pasur uroj që punën kryerësi të gjitha punimet të cilat i arsyeton që i ka kryer ne do të jemi të gatshëm t’ia kryejmë pagesën”, tha ajo.
E para e MKRS-së tha se në buxhetin e vitit 2021 të ministrisë prioritet do ta kenë Muzeun e Natyrës.
Dumoshi: Asnjë investim kapital i këtij viti nuk është proceduar
“Ju e dini që ne jemi duke kaluar në një fazë të jashtëzakonshme, ku këtë vit që edhe me kryetarin e komunës ishim në takim, asnjë investim kapital i këtij viti nuk është proceduar, asnjë aktivitet në zyrën e prokurimit. Tash kanë filluar, unë uroj edhe kryeministri Hoti ka thënë që asnjë projekt nuk do të pësojë në qoftë se vazhdon do të ketë t’i paguajmë detyrimet të cilat i kemi. Tash kemi filluar me i qit në tenderim edhe aktivitetet e ndryshme të investimeve kapitale, jemi në muajin korrik dhe ju e dini ligjin e prokurimit, gjithë ka vonesa, pastaj ankesa. Uroj që bile t’i procedojmë për këtë vit dhe pastaj të fillojmë me projekte për vitin e ardhshëm”, tha Dumoshi.
Në anën tjetër, kryetari i Komunës së Fushë Kosovës Burim Berisha, e ka njoftuar ministren Dumoshi për planet që kanë për ndërtimin e kompleksit sportiv në Sllatinë.
Berisha: Planifikojmë që ta ndërtojmë edhe palestrën sportive
“Ky është kompleksi në Sllatinë, ku planifikojmë që ta ndërtojmë edhe palestrën sportive, në pjesën këtu mbrapa nesh dhe këtu para nesh planifikojmë ta ridizajnojmë pjesën e fushave të ndryshme sportive dhe planifikojmë ta bëjmë një fushë sintetike për futboll të madh dhe disa fusha të tenisit. Deshëm të vijmë në vendin ku do të bëhen, sivjet do të fillojnë nëse arrijmë ose do të bëhen edhe vitin e ardhshëm. Ky është një vend që po planifikojmë për 5, 6 vitet e ardhshme me qenë bukur shumë investime dhe do të ketë shumë shtigje të biçikletave dhe shtigje të ecjeve. Planifikojmë që këto shtigje do të dalin në M-9 në rrugën kryesore, do të thotë është një kompleks i madh, njerëzit po e pëlqejnë dhe do të vazhdojmë që të punojmë për këta njerëz”, tha ai.
Ministrja e Kulturës, Rinisë dhe Sportit Vlora Dumoshi, gjatë ditës ka zhvilluar edhe një takim me kryetarin e Komunës së Fushë Kosovës Burim Berisha.
Dumoshi: Do të mbështesim disa projekte në Fushë Kosovë
Ministrja e Kulturës, Rinisë dhe Sportit, Vlora Dumoshi, ka vizituar sot Komunën e Fushë Kosovës, ku është pritur nga kryetari i kësaj komune, Burim Berisha.
Pas takimit të dy, Dumoshi e Berisha, tha se kanë diskutuar për projektet në fushën e kulturës, rinisë dhe sportit në këtë komunë.
Ministrja Dumoshi, tha se do të mbështesin disa projekte të kësaj komune të cilat do të ndikojnë në përmirësimin e kushteve për sportistët e kësaj ane.
Dumoshi: Do të mbështesim projektet e Komunës së Fushë Kosovës
"E kemi palestrën sportive të cilën kryetari shpejt do të fillojë me punime, gjithashtu në pjesën e kulturës e kemi edhe muzeun e natyrës ku është duke u ndërtuar në këtë territor. Njëkohësisht me kryetarin folëm pasi një pjesë të pronës së komunës së Fushë Kosovës, projekti i tij është ideor për një kompleks sportiv, ku do t'i bashkëngjiten edhe fushat sintetike, po gjithashtu edhe fusha të tenisit. Unë sot e kam siguruar kryetarin e Komunës që ne do të bashkëpunojmë shumë edhe për zhvillimin e këtij kompleksi i cili është shumë i nevojshëm", tha ajo.
Ajo tha se me këtë do të përfitojnë sportistët edhe të Komunës së Prishtinës dhe të Fushë Kosovës.
Dumoshi tha se edhe në Kalanë e Harilaqit do të investojnë.
Dumoshi: Do të investojmë në Kalanë e Harilaqit
E kemi kalanë e Harilaqit e cila është në këtë territor, një kala vërtetë shumë unike. Ministria për çdo vit investon në restaurimin, në gjetje dhe këtë vit i kemi paraparë buxhet 20 mijë dhe do të vazhdojmë që të investojmë në këto fusha të cilat janë jetike në përgjithësi për vendin po edhe në programin e qeverisë Hoti", tha ajo.
Ndërsa, kryetari i Komunës së fushë Kosovës, Burim Berisha, tha se me ministren Dumoshi kanë biseduar për investimet kulturore dhe sportive në këtë komunë.
Berisha: Diskutuam për realizimin e disa projekteve
"Diskutuam për realizimin e disa projekteve, siç është palestra sportive, pastaj një fushë sintetike. Pastaj disa investime të tjera në trashëgimi, në rini dhe në fusha të tjera. Ishte një takim shumë i këndshëm, shumë miqësor dhe në këtë kohën e pandemisë, por ne do të vazhdojmë të punojmë bashkë, që të kemi sa më shumë fusha sportive, evenimente kulturore dhe te ngjashme", tha ai.
Dumoshi dhe Berisha kanë vizituar edhe Muzeun e Natyrës tek Pishat.
