​Serbët e veriut përshëndesin marrëveshjen për energjinë, pajtohen ta paguajnë rrymën

Kosova

​Serbët e veriut përshëndesin marrëveshjen për energjinë, pajtohen ta paguajnë rrymën

Më: 22 qershor 2022 Në ora: 12:00
Ilustrim

Serbët e veriut të vendit kanë përshëndetur marrëveshjen për energjinë elektrike të arritur dje në Bruksel në mes të Kosovës dhe Serbisë, e cila do të mundësojë inkasimin e rrymës së shpenzuar në katër komunat veriore, përkatësisht Mitrovicë të Veriut, Zvecan, Leposaviq dhe Zubin Potok.

Ata, të anketuar nga KosovaPress, thonë se ndonëse nuk i dinë detajet e kësaj marrëveshje, megjithatë duhet të fillojnë ta paguajnë rrymën e harxhuar.

Millosh Golluboviq, qytetar nga veriu i Mitrovicës, nuk e sheh si problem faturimin e energjisë elektrike, duke thënë se qytetarët duhet të paguajnë rrymën që e harxhojnë.

Sipas tij, marrëveshja e arritur do të zgjidhë veç tjerash edhe gërmimin ilegal të kriptovalutave në veri të Kosovës, që sic tha ai, ka paraqitur problem të madh deri tash.

Golluboviq: Po jetojmë jetë normale, duhet ta paguajmë rrymën

“Edhe pse është arritur marrëveshja, nuk dimë shumë se çka saktësisht do të thotë kjo për qytetarët para së gjithash në veri. Po supozoj se kjo nënkupton që në një periudhë kohore rryma do të fillojë të paguhet. Në anën tjetër, mendoj se kjo do të rregullojë edhe gërmimin ilegal të kriptovalutave, që në veri të Kosovës paraqet një problem të madh… Natyrisht, po jetojmë një jetë normale, do të duhej ta paguajmë (rrymën), kështu që nuk shoh ndonjë problem sa i përket kësaj”, ka thënë Golluboviq.

Edhe Filip Vullic, një qytetar tjetër nga veriu, pajtohet se duhet paguar faturat e rrymës dhe se kjo çështje nuk paraqet ndonjë problem.

Vullic: Sigurisht, do ta paguajmë rrymën

“Unë konsideroj se s’ka problem nëse pajtohen të dyja palët, dua të them nëse është në interes të serbëve dhe shqiptarëve të cilët jetojnë këtu…Po, po, sigurisht do ta paguajmë rrymën, nuk është kjo problem”, theksoi Vullic.

Radomir Saviq, thotë se marrëveshja e arritur është një gjë e mirë që ka ndodhur, dhe se është e rëndësishme vetëm që qytetarët të mos kenë probleme.

Ai shpreson që kjo marrëveshje të mos ndryshojë dhe të respektohet.

Saviq: Do ta paguajmë rrymën, s’kemi çfarë të bëjmë

“Mirë është që kanë siguruar që të kemi rrymë këtu dhe të mos kemi probleme. ndërsa nuk di çka do të ndodhë tutje. Nëse kjo marrëveshje respektohet dhe nëse nuk vjen te ndonjë ndryshim sërish…Po, do ta paguajmë nëse duhet, deri tash s’kemi paguar, por nëse duhet do ta paguajmë, s’kemi çfarë të bëjmë”, tha Saviq.

Nebojsha Didic, u shpreh se me rëndësi është që situata të jetë e qetë, duke thënë se duhet paguar jo vetëm rryma, por edhe uji dhe shërbimet e tjera.

Didic: Të paguhet rryma, uji dhe të tjerat

“Dashtë Zoti të jetë mirë dhe të paguhet rryma, uji dhe të gjitha tjerat”, tha ai.

Ndryshe, nga viti 1999 deri më 2017, borxhin për veriun e Kosovës e kanë paguar qytetarët e komunave tjera të vendit. Faturat e tyre kanë qenë më të larta për 3.5 për qind. Megjithatë, pas ankesave të shumta, Gjykata e Apelit në Kosovë ka vendosur në fund të vitit 2017 për pezullimin e kësaj praktike, duke konstatuar se është e paligjshme. Ky vendim më vonë është konfirmuar nga Gjykata Kushtetuese e Kosovës dhe pagesa ka kaluar te Operatori i Sistemit, Transmisionit dhe Tregut të Energjisë Elektrike në Kosovë (KOSTT), sipas të cilit është bërë e ditur se humbjet nga mos pagesa e rrymës në veri kanë arritur shumën prej 40 milionë eurosh vetëm në vitin 2021.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat