Ministri i Inovacionit dhe Ndërmarrësisë, Besim Beqaj, deklaroi se Kosova është vend atraktiv dhe me potencial të madh për investime nga investitorët e huaj.
Ai këto komente i bëri në “Forumin Botëror për Investime të Bizneseve Engjëj”, që po mbahet në Stamboll të Turqisë, i cili ka për qëllim fuqizimin e zhvillimit ekonomik në botë.
Ministri Beqaj si folës në panelin kryesor të këtij forumi ka folur me temën “Financimi i Inovacionit përmes ndikimit të investimeve në Evropën Juglindore.
Ai me këtë rast ka theksuar përparësitë dhe potencialin e Kosovës për tërheqjen e investimeve nga bizneset engjëj.
Po ashtu Ministri prezantoi para të pranishmëve të arriturat dhe sukseset e Qeverisë së Kosovës, komunitetit të biznesit dhe organizatave të ndryshme që kanë dhënë rezultate, duke ndikuar në zhvillimin e bizneseve dhe ndërmarrësisë.
Ministri Besim Beqaj ka folur edhe për angazhimin dhe përkushtimin e tij në udhëheqje të Ministrisë së Inovacionit dhe Ndërmarrësisë për mbështetje të ndërmarrësve të rinj dhe lehtësirave që do tu ofrohen inovatorëve në financimin dhe zhvillimin e ideve inovative.