Drejtues të Sindikatës së Shërbimit Civil të Kosovës në një konferencë për media kërkuan të nivelohen pagat e shërbyesve civil me sektorët e tjerë me Projektligjin për Pagat për sektorin publik.
Ata kërkuan që të njihet përvoja e punës për punëtorët e administratës shtetërore të cilët kanë punuar në bazë të Ligjeve të Republikës së Kosovës e të cilët janë larguar nga puna në okupimin serb, ashtu siç iu është njohur kjo përvojë mësimdhënësve.
Nëse nuk realizohen këto kërkesa paralajmërojnë greva në vendin e punës dhe protesta, ndërsa thonë se do ta paralizojnë administratën e shtetit.
Mursel Zymberi kryetar i kësaj Sindikate tha se shqetësimet janë mjaft të mëdha te të gjithë shërbyesit civil për projektligjin e pagave.
“Shërbyesit civil po ndihen të diskriminuar. Jemi të detyruar të marrim masa për nivel të barazisë. Është e turpshme që në sistemin e drejtësisë të rriten pagat tri herë më shumë se shërbyesve civil me përgatitje të njëjtë. Kjo tregon kapjen e shtetit nga ata që janë në pushtet. Sepse ka dallime të mëdha në paga”, tha Zymberi.
Ai ngriti shqetësimin tjetër për mos njohjen e përvojës së punës për të gjithë ata punëtorë të cilët mbrojtën kauzën kombëtare.
“Shqetësim tjetër mbetet mos njohja e stazhit të punës për ata punëtorë të cilët për një kauzë kombëtare lëshuan punën e sistemit të Serbisë, ndërsa ata të cilët pranuan në sistemin e administratës së Serbisë në vitet e 90-ta , institucionet e Kosovës paguajnë pensionin e plotë. Ky është më shumë se diskriminim”, theksoi Zymberi.
Sipas Zymberit ka vetëm tendencë të uljes së pagave në këtë sektor. Me projektligjin e ri 1000 euro është paga më e lartë, në këtë rast sekretari permanent, ndërsa paga e më e ulët e një nëpunësi civil 380 euro.
Kjo, sipas tyre është e papranueshme, kërkohet nivelim i njëjtë sikur në të gjithë sektorët tjerë. Remzije Zekolli, nënkryetare kësaj sindikate ka thënë se të enjten më 4 tetor punonjësit e komunës së Vushtrrisë do të protestojnë për shkak të projektligjit për paga që po konsiderojnë se është diskriminues.
Protesta do të mbahet prej orës 9 deri në orën 10. Edhe komuna tjera kërkojnë që shumë shpejt do të mbajnë protesta.
