Njësiti i Hetimeve të Përgjithshme e rajonit të Prishtinës, e përkrahur edhe nga Njësiti Special Operativ, konform urdhëresës së lëshuar nga Gjykata themelore, sot ka bastisur tri lokacione në Gollubovc të Malishevës, me ç’rast është arrestuar një person i dyshuar për vjedhje të rëndë.
Ky operacion bastisjeje ka ardhur si rezultat i një pune operative dhe hetimore që hetuesit policor kanë bërë lidhur me identifikimin dhe kapjen e personave të inkriminuar në një rast të vjedhjes së rëndë që ka ndodhur në nëntor të vitit 2018 në fshatin Dobroshevc të Drenasit.
Operacioni i bastisjes ka rezultuar me gjetjen dhe sekuestrimin e një arme automatike AK 47, dy karikatorë, 23 fishekë, si dhe dëshmi të tjera që mund të ndërlidhen me një rast të vjedhjes.
Personit të dyshuar F. M, (37), shtetas i Kosovës, i është shqiptuar masa e ndalimit dhe ai është dërguar në qendrën e mbajtjes. Ndaj tij është iniciuar rasti për mbajtje në pronësi, kontroll ose posedim të paautorizuar të armës.