Bazuar në planin operativ “Mbrojtja e pyjeve 2019” , njësitet policore të Stacionit Policor në Shtime, në mbështetje të Njësisë për reagim të shpejtë nga DRP Ferizaj, kanë vazhduar me angazhimin tyre të filluar kohë më parë lidhur me prerjen e pyjeve dhe transportimit ilegal të drunjve.
Gjatë ditës së djeshme dhe sot, në fshatrat Reqak, Mollopolc dhe Petovë, njësitet policore kanë arrestuar pesë persona dhe janë konfiskuar katër traktorë si dhe një sasi e drunjve duke u transportuar në mënyrë ilegale.
Gjithashtu, në fshatin Petrovë, në oborrin e njërit nga të dyshuarit janë gjetur rreth 200 metra dru të prera në mënyrë ilegale.
Inspektorët e Ministrisë së Bujqësisë-Agjencioni Pyjor i Kosovës janë njoftuar lidhur me rastin dhe do të vazhdojnë procedurat ligjore, si dhe konfiskimin e masës drunore.
Plani operativ është në vazhdim, njofton Policia e Kosovës në një njoftim për media.