Sonte në Pejë janë bastisur disa lokacione nga Policia e Kosovës me kërkesë të Prokurorisë Themelore.
Gjatë këtij aksioni janë konfiskuar mbi 1500 kg mish.
Ndërsa mbrapa grilave përfunduan dy persona për veprën penale “Vënia në qarkullim e artikujve të dëmshëm ushqimor”.
Këtë e ka konfirmuar, zëdhënësi i Prokurorisë në Pejë, Shkodran Nikçi.
“Me kërkesë të Prokurorisë Themelore të Pejës sot janë bastisur disa lokacione nga Policia e Kosovës në bashkëpunim me inspektorët e AVUK-ut. Gjatë bastisjes, janë sekuestruar mbi 1500 kilogram mish dhe të njëjta janë asgjësuar pas vlerësimit nga ana e zyrtarëve të AUV. Lidhur me këtë rast, Prokurori i Shteti ka ndaluar dy persona te dyshuar për veprën penale “Vënia në qarkullim e artikujve të dëmshëm ushqimor””, ka thënë ai.
Ndryshe, Policia e Kosovës më parë ka njoftuar se gjatë ditës së sotme janë konfiskuar dhe asgjësuar mish i gjedhit i pavulosur (prejardhja e dyshuar), si dhe sasi të qofteve dhe qebapëve derivat i mishit të lartcekur ne sasi prej 614.260 kg.
