Policia e Krujës ka vënë në pranga një 26 vjeçar të shpallur në kërkim për plagosje. Në pranga ka rënë shtetasi me inicialet B. X, banues në fshatin Nuaj, pasi Gjykata e Shkallës së Parë Krujë i ka caktuar masën e sigurisë “Arrest në burg”, për veprat penale “Plagosja e rëndë me dashje” dhe “Mbajtja pa leje e armëve të ftohta”.
Ky shtetas, më datë 21 maj në Fushë Krujë ka plagosur me thikë për motive të dobëta, shtetasit S. T. dhe E. Gj.
Ndërkohë policia e Durrësit arrestoi shtetasin L. D., 21 vjeç, banues në Durrës, pasi në lagjen nr. 17, Durrës, duke drejtuar mjetin tip “Volkswagen”, ka aksidentuar dhe është larguar nga vendi i ngjarjes, këmbësorin me iniciale F. V., 79 vjeç, banues në Durrës, i cili ndodhet në spital, nën kujdesin e mjekëve, jashtë rrezikut për jetën.
Materialet i kaluan Prokurorisë së Rrethit Gjyqësor Krujë dhe Prokurorisë së Rrethit Gjyqësor Durrës, për veprime të mëtejshme.
