Gjuajtje me armë zjarri janë dëgjuar këtë të shtunë në rrugën “Tahir Sinani” në Ferizaj.
Rastin e ka bërë të ditur zëdhënësi i policisë për Rajonin e Ferizajt, Kanun Veseli.
Sipas tij, një 35-vjeçar dyshohet se sa ishte duke ecur rrugës, ka shtënë dy herë me armë në ajër.
“Më datën 28.05.2022 rreth orës 19:35 Policia Rajonale e Ferizajt ka pranuar një informatë se në rrugën ‘Tahir Sinani’ ka gjuajtje me armë zjarri. Policia ka dalë në vendin e ngjarjes dhe kanë gjetur dy gëzhoja”.
“Nga informatat e para dyshohet se një person i moshës rreth 35-vjeçare derisa kishte qenë duke ecur në këmbë kishte nxjerrë një armë nga brezi dhe kishte shtënë dy herë në ajër dhe i njëjti kishte vazhduar në rrugën Tahir Sinani në drejtim të ‘’Viva Fresh Store’’”, ka thënë Veseli.
Policia thekson se rasti në fjalë është duke u hetuar nga organet e rendit.
