Tri raste të dhunës në familje janë raportuar gjatë 24 orëve të fundit në Pejë, Malishevë dhe Vushtrri. Lidhur me këto raste janë arrestuar tre të dyshuar.
Në raportin 24 orësh të Policisë, thuhet se në Pejë u arrestua një person pasi dyshohet se kishte tentuar ta godasë motrën e tij. I dyshuari rezultoi se kishte urdhërarrest.
“Pejë 12.04.2025 – 20:30. Është arrestuar i dyshuari mashkull kosovar, për shkak se kishte tentuar ta godasë motrën e tij, por veprimin e tij e kishte ndaluar babai i tyre. I dyshuari gjatë verifikimit rezulton se posedon urdhër arrest, është konsultuar prokurori dhe me vendim të tij i dyshuari është dërguar në mbajtje për 48 orë”, thuhet në njoftim.
Kurse, në Malishevë u arrestua një i dyshuar për rrahje të bashkëshortes.
“Malishevë 11.04.2025 – 12:00 Është arrestuar i dyshuari mashkull kosovar, pasi i njëjti pas një mosmarrëveshje kishte sulmuar fizikisht bashkëshorten e tij. Me vendim të prokurorit i dyshuari është dërguar në mbajtje”, thuhet në njoftim.
Ndërsa, në Vushtrri u arrestua i dyshuari se tentoi t’i merrte fëmijët nga nëna e tyre.
“Vushtrri 12.04.2025 – 18:12. Është raportuar se ish bashkëshorti, i dyshuari mashkull kosovar, ka tentuar t’i marrë fëmijët nga nëna e tyre. Palët janë intervistuar dhe me vendim të prokurorit i dyshuari është arrestuar dhe dërguar në mbajtje”, njofton Policia.
