Policia e Tiranës ka vënë në pranga autorin e dytë të dyshuar për dhunimin e një efektivi të policisë me qëllim grabitjen. Ngjarja ka ndodhur me 22 shtator tek Unaza e Re.
I arrestuari është Alltan Dafku, 25 vjeç, banues në Tiranë. Gjykata e Rrethit Gjyqësor Tiranë, me vendimin penal, ka caktuar masën e sigurisë “Arrest me burg”.
Dafku sëbashku me Alfonc Locin, i arrestuar nga policia, kanë tentuar t’i vjedhin portofolin në autobusin e linjës Kamëz-Tiranë, efektivit të policisë K.B.
Dy hajdutët e kanë goditur me grushta policin.
Në momentin e ngjarjes ai ka qenë civil. Polici 22 vjeçar mori lëndime për të cilat mori mjekim në spital.
Materialet Proceduriale i kaluan Prokurorisë pranë Gjykatë së Shkallës së Parë Tiranë, për veprat penale “Vjedhje”, “Vjedhje me dhunë”, “Plagosje e rëndë me dashje” dhe “Goditje për shkak të detyrës”.
Dy të arrestuarit rezultojnë të dyshuar dhe për një sërë vjedhjesh të tjera.
VEPRAT
Nga veprimet e kryera ka rezultuar që këta shtetas janë autor të dyshuar të disa ngjarjeve kriminale, të ndodhura në juridiksionin e Komisariatit Nr.3 dhe Nr.6, ku më konkretisht:
Më datë 22.09.2016, në Bulevardin “Zogu i Parë”, tek një restorant, shtetases R. B., me origjinë Norvegjeze, i kanë marrë portofolin ku në brendësi ka pas një shumë monetare.
Më datë 21.09.2016, tek terminali i autobuzave të jugut, shtetasit A. H., i kanë marrë portofolin ku në brendësi ka pas një shumë monetare. Më datë 29.07.2016, në rrugën “Dritan Hoxha”, në autobuzin e linjës së Tiranës së Re, shtetases M. H., i kanë marrë portofolin ku në brendësi ka pas një shumë monetare.
Më datë 05.08.2016, në Rrugën “Asim Vokshi”, në autobusin e linjës së Unazës, shtetases B. P., i kanë marrë aparatin telefonik.