Dy persona janë arrestuar në Portin e Durrësit pasi u ofruan rryshfet policëve gjatë kontrollit kufitar. Në të dy rastet, bankënotat në euro u futën në faqet e pasaportave.
Vangjel Bardhi, 21 vjeç nga Tirana dhe Tofik Shehu, 25 vjeç nga Peshkopia, u ndaluan në terminalin e pasagjerëve.
Bardhi futi 50 euro te pasaporta e tij, pasi, siç tregoi pas arrestimit, i kishte kaluar ditët e qëndrimit në Shengen. Ndërsa Shehu, i cili tentoi t’u jepte 20 euro policëve, ishte person i dëbuar nga zona Shengen. Ata akuzohen për korrupsion aktiv të personave në funksione publike.
