Është parandaluar nga policia e Lushnjës një vrasje brenda familjes. Mësohet se gjatë natës së kaluar, policia është njoftuar se në lagjen “Karbunarë e Madhe”, Lushnjë, ka një konflikt në familje.
Menjëherë pas informacionit, në vendngjarje shkojnë shërbimet e policisë të cilët bëjnë të mundur shuarjen e konfliktit dhe arrestimin e 74-vjeçarit Dervish Mezini.
Ky i fundit ka dhunuar dhe i ka vënë thikën në fyt djalit të tij, shtetasit me inicialet A. M., 45 vjeç, duke e kërcënuar se do ta vriste.
Policia ka njoftuar gjithashtu se gjatë kontrollit të ushtruar në banesë iu gjet dhe iu sekuestrua në cilësinë e provës materiale një armë zjarri tip pistoletë model 54, të cilën e mbante pa leje.
Ndërkohë materialet në ngarkim të të arrestuarit i kaluan Prokurorisë pranë Gjykatës së Shkallës së Parë Lushnje për veprat penale “Dhunë në familje” dhe “Prodhimi dhe mbajtja pa leje e armëve dhe municioneve luftarake”.