Dy persona janë kapur mat teksa shpërndanin drogë në ambientet e një lokali. Zbulimi u bë pasditen e djeshme, në qytetin e Shkodrës.
Të arrestuarit janë Hidisen Dervishi, 24 vjeç dhe Rei Besho, 19 vjeç, banues në Shkodër.
Arrestimi i tyre u bë pasi në orën 17:34 të pasdites së të premtes, në portalin e komisariatit dixhital ka ardhur një raportim nga një qytetar anonim, se në një lokal dy të rinjtë shpërndanin lëndë narkotike.
Efektivët e policisë shkuan në lagjen Vasil Shanto, në një lokal me lojëra kompjuterike ku u gjetën dy të rinjtë.
Nga kontrolli i ushtruar në këtë lokal u gjetën të fshehura në një çantë tre qese plasmasi me lëndë narkotike kanabis sativa, ku rezultuan me peshë 8 gramë të cilat u sekuestruan në cilësinë e provës materiale.
Ndaj të dyshuarve hetimet janë në vijim, ndërkohë që materialet iu referuan Prokurorisë së Shkodrës për veprën penale të “Prodhimit e shitjes së narkotikëve”.
