Protestat kundër qeverisë së Edi Ramës kanë një kosto për qytetarët dhe militantët e PD që dali në shesh, apo i zënë prita shefit të ekzekutivit, siç ka ndodhur rëndom në Fier, Librazhd, Elbasan, e së fundmi dhe në Kukës.
Kostoja është arrestimi i shumë prej tyre, të cilët akuzohen për kundërshtim të forcave të rendit.
Por, një histori e rrallë është publikuar nga kreu i degës së PD-së në Kukës, Afrim Rexhmati në rrjetet sociale, si për të treguar se dhjetëra nga ata që dalin kundër Ramës janë qytetarë të thjeshtë, të shtyrë nga hallet e jetës për të protestuar.
Sipas tij, Kujtim Shala është një banor i Mamëz të Kukësit, jo anëtar i PD-së, që u ndalua nga policia pasi mori pjesë në protestën e 16 marsit.
“Kujtimi është i sëmurë me diabet, por më e dhimbshme është ajo, kur në portofolin e tij, policia gjeti vetëm një kartë identiteti. Kujtimi nuk kishte në xhep asnjë qindarkë”, shkruan Rexhmati.