...Nuk kam dashur të dal e ta bëj fora,po ja që e solli puna e zamani.Doli i biri i botës në gazetë edhe lëvdoi veten se është petriot kombëtar i zjarrtë dhe për mua nuk tha një fjalë!
Dale, more zotni, dale, se edhe na hamë bukë e pimë raki me meze!
Kur u bë,mor zotni, Shqipëria Republikë Kombëtare më 1925, unë kam thirrur i pari majë Ballkani të prefekturës ku ish mbledhur mileti pa brekë. Populli kreshnik pa brekë! Rroftë Republika shqiptare! Rroftë Presidenti!
Kam hequr pastaj edhe një telegram urimi në emrin e popullit pa brekë e pa misër dhe kam marrë përgjigje. Këtë përgjigje e kam vënë në xhep si hajmali e më ka hyrë në punë shumë herë kur kam pas ngatërresa me kontrabandat e me të dhjetat që nuk i kam paguar, si patriot kombëtar që jam.
Kur u mërzitë bota me republikë-se e mirë është jahnia,po nuk hahet çdo ditë... mblodha pëseri miletin edhe thirra: Popull kreshnik! Isaf, bre, me republikë! Ne frëng nuk jemi, po shqiptarë ,bre!
Kurorën e Skënderbeut ia dhamë Viktor-beut, edhe na i mbushi xhepat me napolona.
(Botuar më 1943)