Fatmira Kuçuku-Kujovska ka sjellë një tjetër frymë artistike në Prishtinë. Pos që ekspozitat me vepra të punuara në qeramikë janë të rralla në këtë anë, teknika e mjeshtëria e saj në punimet e paraqitura në ekspozitën personale që është hapur të premten mbrëma në galerinë “Monet” janë unike. Fokusi i artistes janë portretet e grave shqiptare bashkë me motivet autoktone. Procesi i punës është histori në vete. Por veprat e saj janë konsideruar si të një mjeshtreje të nivelit të lartë. Ndërhyrja me ngjyra në qeramikë bën që punimet të marrin një tjetër pamje. Por Kuçuku-Kujovska mban baraspeshën midis ngjyrave dhe vetë skulpturave. Është prej atyre artisteve që gjithmonë është në kërkim të teknikave të reja. E qeramika për të është materiali ku shprehet më së miri.
Në hapje të ekspozitës, Kuçuku-Kujovska ka thënë se vazhdimisht ka ditur të luajë me motivin shqiptar. Portreti për të është një gjetje artistike që gjithmonë ofron mundësi të reja.
