Atdheu
Atdheu në emër të atit të birit e të shpirtit të shenjtë
kur për engjëllin e lindur vie pagëzimi
Atdheu në emër të atit të birit e të shpirtit të shenjtë
kur për emër e tokën e të parëve bie trimi
Cungu
Në të e mbi të shumë drurë ishin prerë
as dhëmbje as keqardhje nuk kishte ndjerë
Gjithnjë menduar kishte se duke rralluar fisin
ata që bënin krim atij i hiqnin plisin
Në fund të dimrit nga sëpatë e njejtë ishte çarë
pa nam e pa nishan përfunduar kishte në zjarr
Hije
Hije nuk është vetëm te e qiellit
hije nuk është vetëm eklips i diellit
Hije nuk është vetëm degë e lisit
hije nuk është vetëm mbulesë e plisit
Hije është edhe fjalë e përbiruar ndër dhëmbë
hije është edhe dinjiteti i shkelur me këmbë
Herë-herë
Herë më prite herë të prita
në teh drite u thye dita
Herë më erdhe herë të erdha
zog në çerdhe lotin derdha
Herë më ike herë të ika
ëndërr gjumi pika-pika.