Rrokin kazma e lopata
Sorollaten në fushata
Gropa hapin ku t'u teket
Por fidani s'di ku tretet
Ca u prishen ditë për ditë
Ua hanë cjeptë e ua hanë dhitë
Ata thonë "Rroftë politika"
Fitojnë vota, fitojnë pika
Si kurora hapen fletët
Rriten pemët zgjaten degët
K'ta vazhdojnë me avaz t'vjetër
Shumë në xhepa, pak në letër
Shtohen pemët bukur, besa
Pak n'natyrë e shumë në shkresa
Shumë me laps, pak me lopatë
Kështu xhepat s'u rrinë thatë
Thonë "Do t'hapim mija vende"
L'shojnë gënjeshtra rende rende
E mandatet kur fitojnë
Krejt harrojnë e mbyllin gojë
Bëhen gati ashiqare
Për dredhi hiq s'u vjen marre
I mbajnë mendtë veç në TENDERA
Nga ta bëhen milionera
Kur vjen puna për llogari
Na gënjejnë për mrekulli
Statistika dhe fatura
S' skuqen fare, rrejnë si burra
Edhe populli n'zavall t'vet
Nuk e di se çka e gjet
I përçarë në shumë parti
Si e ujqve lukuni
K'shtu e don sot politika
Me kritika e replika
S'ka rëndësi se kush çka thot'
Me rënd'si është-XHEPI PLOT
Shumë gënjeshtra e dallavere
Ru'na Zot nga kjo derexhe
Sikur dje po ndodh dhe sot
Runaj mendt, i madhi Zot.