Fillon edicioni i 19-të i Festivalit të Filmit Frankofon, në Kosovë - Bota Sot
Fillon edicioni i 19-të i Festivalit të Filmit Frankofon, në Kosovë

Kultura

Fillon edicioni i 19-të i Festivalit të Filmit Frankofon, në Kosovë

Më: 13 nëntor 2019 Në ora: 14:32
Pamje nga Festivali

Që nga sot e deri me 18 nëntor, në Kosovë, do të mbahet Festivali i Filmit Frankofon, që këtë vit tematika e cila zë vend në filmat e këtij festivali është komedia.

Hapja e festivalit do të bëhet sot në orën 19:30, në Kinoaarmatë, me shfaqjen e filmit premier: “L’Esprit de famille” nga Eric Besnardi. Ndërsa, pjesë e programit do të jenë komeditë nga Belgjika, Zvicra dhe Franca, që këtë edicion do të udhëtojnë në kinematë e Prishtinës, Prizrenit, Mitrovicës, Pejës dhe Gjakovës.

Risi për këtë edicion do të jetë edhe filmi kosovar “Pranverë e paharruar në fshatin e harruar”, nga Kushtrim Bekteshi, film i cili ishte edhe pjesë e Festivalit Ndërkombëtar në Nancy të Francës.

Në një konferencë shtypi, ambasadorja e Francës në Kosovë, Marie Christine Butel, tha se këtë vit e kanë përzgjedhur që të nderojnë komedinë dhe humorin.

 “Kam kënaqësinë të shpalli të hapur edicionin 19 të festivalit të filmit frankofon, sivjet kemi zgjedhur të nderojmë komedinë dhe humorin. Humor nga Belgjika, Zvicra, Luksemburgut, Kosovës dhe të Francës do të jetë i pranishëm në kinematë e Prishtinës, Prizrenit, Pejës, Mitrovicës, Gjakovës dhe të Vushtrrisë. A ka më mirë se një festival për të na bashkuar të gjithëve frankofonët dhe dashamirët e artit të shtatë rreth kësaj gjuhe të cilën e ndajmë. Kosova ka përzgjedhur në vitin 2014 të bëhet anëtare vëzhguese e organizatës ndërkombëtare të Frankofonisë, që atëherë ka filluar me sukses një politikë proaktive për të promovuar rrezatimin e gjuhës frënge në vend”, tha ajo.

Ajo tha se Kosova është një akter i vërtetë në botën e filmit të Frankofonisë. Kjo sipas saj, është arsye pse kanë vendosur që sivjet të nderojnë krijimtarinë bashkëkohore kosovare duke dekoruar me urdhrin e artëve dhe letrave regjisoren frankofone Blerta Zeqiri. 

Ndërsa, Albert Prenkaj, drejtor i përgjithshëm në Ministrinë e Punëve të Jashtme, u shpreh se çdo vit organizohen aktivitete të ndryshme për promovimin e frankofonisë në Kosovë.

 “Çdo vit aktivitete të ndryshme organizohen për promovimin e frankofonisë në Kosovë. Ambasada Frankofone dhe Ministria e Punëve të Jashtme e Republikës së Kosovës dhe institucione tona në përgjithësi bashkëpunojnë ngushtë për të ofruar publikut të gjerë mundësinë për të zbuluar një univers të pafund të pasurive kulturore të botës frëngjisht folëse. Thonë se kinemaja është një gjuhë universale që bashkon njerëzit më të larmishëm, për 19 vjet java e filmit frankofon mbledh së bashku dashamirët e mëdhenj të gjuhën dhe kulturës frankofone, të cilët janë të shumtë dhe që ekzistojnë tradicionalisht në vendin tonë. përmes aktiviteteve të tilla ne theksojmë përkushtimin tonë të fuqishëm për forcimin e pranisë së gjuhës dhe kulturës frankofone në Kosovë, por edhe angazhimin tonë për vlerat që na bashkojnë me familjen e madhe frankofone, siç janë promovimi i paqes, demokracisë, barazisë gjinore dhe të drejtave të njeriut”, tha ai.

Pauline Menthonnex nga ambasada e Zvicrës në Kosovë, tha se kinematografia përbënë një mjet të jashtëzakonshëm për të trajtuar stereotipat, por edhe për të qeshur. 

 “Në Zvicër jetojnë 1 milionë e 800 mijë frankofon, çka do të thotë përafërsisht popullsia e Kosovës, do të thotë e kemi për zemër që të promovojmë gjuhën franceze në Zvicër. Zvicra është shumë krenare të numërojë në popullatën e saj shumë kosovar frankofon në kantonet e vogla. Në Zvicër sikur në Kosovë veçantitë gjuhësore janë shumë të forta dhe identitetet që i karakterizojnë secilën prej regjioneve tona përforcojnë edhe më shumë ndjenjën e përkatësisë. Në Zvicër si në Kosovë dallimet e aksentëve prej një rajoni në tjetrin shpesh janë burim i shakave, dallimi i shprehjes në gjuhën frënge mes Zvicrës dhe Francës gjithashtu, të cilët mund të krahasohen me dallimet mes Kosovës dhe Shqipërisë”, tha ajo.

Mbështetje për Festivalin e Filmit Frankofon në Kosovë ka premtuar drejtoresha e Kulturës në Ministrinë e Kulturës, Rinisë dhe Sportit, Jehona Shyti.

 “Ne si Ministri e Kulturës, Rinisë dhe Sportit do të vazhdojmë ta mbështesim anëtarësimin në këtë organizatë përmes financimit të aktiviteteve të shumta, të cilat në vazhdimësi po janë të larmishme dhe po sjellin vlera të shumta përpara publikut kosovar. Jam e lumtur edhe një herë po e them që në emër të Ministrisë së Kulturës sot të garantoj se do të jemi përkrahësit e këtij aktiviteti dhe të aktiviteteve të tjera të kulturës me rastin e aktiviteteve të shumta të Frankofonisë”, u shpreh ajo.

Festivali i filmit do të mbyllet më 18 nëntor në orën 19:00 në Kinoarmatë me filmin nga Luksemburgu “Superjhemp Retorns” nga Felix Koch.

Festivali i Filmit Frankofon në Kosovë organizohet në bashkëpunim me përfaqësitë diplomatike të Zvicrës, Belgjikës dhe Luksemburgut, Aleancën Franceze të Prishtinës, Ministrinë e Jashtme, si edhe Ministrinë e Kulturës, Rinisë dhe Sportit të Kosovës.

Shfaq komentet
comments powered by Disqus
Sot mund të lexoni Shfletoni kopertinat