1.
Nga ninullat e ëmbla,
E shtrenjta ime nënë,
Shumëherë, unë biri Yt
Në gjumë pata rënë.
Tani më erdhi radha
Dhe mua, e dashur nënë,
Këngët të t'i këndoj
Por Ti, s' zgjohesh, nënë!
Fytyra Jote e bukur,
Zemra jote e dëlirë
Sa shpesh më kujtohen,
O nëna ime e mirë!
Buzëqeshjet e ngrohta
Porsi rrezet e diellit,
Sytë Tu shkëlqimtarë
Si kaltërsia e qiellit.
Në ëndërr më shfaqesh,
Shpeshherë e menduar
Prapë më këshillon
Rrugët për t'm'i treguar.
Shkove në amshim
E dashur nënë Ti
Udhërrëfyese për mua
Gjer në përjetësi
2..
Sa e ëmbël
Fjala Jote!
Sa i zjarrtë
Shikimi Yt!
Ç’po më dhemb
Zemra për Ty,
Nënë-
E shtrenjta dashuri!
Sa përkëdhelëse
Dora Jote.
Sa e këndshme
Gjer në joshje!
Ç’po më djeg
Zemra për Ty,
Nënë-
E shtrenjta dashuri!
3.
Në jetën time-
Frymë e ngrohtë plot dashuri
Në zemrën time-
Fjalë e ëmbël me dëlirësi
Në ëndrrën time-
Rreze që që ndriçon në kaltërsi
4.
Kur i pushi zemra,
Ngadalë në dhe e lëshuam,
Lulet seç u thanë,
Fluturat fluturuan...
Trupi i saj i lehtë
Mezi e prekte tokën,
Ç'dhembje n'zemrën time!
Ç'lotë nga sytë më rrodhën!...
5.
Balli Yt-
Një Abetare.
Syri Yt-
Një Dritare.
Zemra jote-
Një Fole.
Yti emër-
Vulë në zemër.