Në sytë e tu u bëra flakë dielli
Një jetë shkrumë e hi m'u ba
Atëherë kur ishe më e bukura aromë
Një trëndafil i shpirtit dhe kopshtit tonë
Sytë e tu më bënë luftëtar betejash
Lutje të shpirtit tim të dehur për ty
Për ta pushtue ëndrrën e mbretëreshës
Më jetue n'botën pa dritë ku ti je drita ime
Kam dashur t'jetoj nën fundin e Titanikut
Me simfonitë e buzëve t'etura t'jetës
Aty ku botën time ma bëre copë e grimë
Pse të desha më shumë së Mona Lizën
Kurrë ma s'të takova në tokë as det
Dymijë vjet të kërkova e s'të harrova jetë
Diellin e luta të ngroh më shumë së lulet
Të të sjell shi të mos mbetësh as e etur
Tani kur të gjeta më ishe ba mbretëreshë
N'sytë e tu t'u bëfsha luan oj burrneshë
Të shkruaj vargun buzëve t'nusërisë
Ma rikthe kohën e shejtë të lumturisë.
KOHË MASKASH
Për një çast takova ufot
Kohën ç'ma çmenden maskarenjtë
Apokalipsat u mbyllën n'maska
Askush nuk i çahet së vërtetës
Kohës sime i duhesh sot o kurrë
Për ta gjetur një fjalë të pathënë
Një varg që aty ti më rri si mbretëreshë
E dimë kush e sjelli kohën e maskave
Ç'faj më ka e bukura e detit
Për mëkatet e fundosjes së Titaniku
S'kam për t'i harrue simfonitë e Betovenit
Edhe nëse bajlozët më thyen n'shpirt
Do vetvritet një ditë koha e maskarenjve
Lum ai kush jeton n'kohë pa maska
Dashuritë i falën për brezat e lirisë
Në këtë kohë maskash
E desha një varg a fjalë shpirti
Edhe nëse më deh a më bën t'krisur
Sonte njëqind lutje ia bëra shiut
Të mos më sjellë stuhi t'çmendura
Mjaft i kam përmbi retë korbiane
Nuk njohin zotëra as jetë trëndafilash.
FLOKU I SHEJTË
Gjithçka nisi me flokun tënd Eva
S'kishim frikë nga koha e krisur e Adamit
Edhe pse perandorët u bënë dashnorë t' marrë
Sa keq edhe pushtues mbretëreshash
Në një natë i kalova njëmijë nëtë t'përrallave
Ç'bëhëj nëse isha i vetmi krijues i muzeut t'zemrës
Apo një rrëfimtar i gjallë donkishotian
Eca me dhimbjen e njeriut besnik t'fjalës
Më çmendi fytyra e shpetimtarës së Otrantos
Për një çast shiu qetësoj stuhitë e plagëve t'shpirtit
Desha të bëhem perandor i dashurive venedikiane
T'i mundi bajlozët e jetës së ëndrrave
Për ty e bukura e detit
Treqind kalorës mirëditas ende presin
Të rinisen sërish legjendave të nusërisë
Nësë e duam përjetë bekimin e Gjergjit
Nuse të duam Erna e mbretëreshë për
hyjni.
