Këshilli Kosovës për Trashëgimi Kulturore në mbledhjen e mbajtur, bazuar në kompetencat ligjore ka bërë shpalljen e 23 aseteve të trashëgimisë kulturore në mbrojtje të përhershme, të cilat janë propozuar nga Ministria e Kulturës, Rinisë dhe Sportit.
Në një njoftim për media thuhet se procesi i shqyrtimit të aseteve të propozuara është zhvilluar në disa faza, duke përfshirë analizën e dosjeve të propozuara, kualifikimin dhe vlerësimin e gjendjes së tyre.
“Ky proces është finalizuar me shpalljen e 23 aseteve në mbrojtje të përhershme pas shqyrtimit, vlerësimit dhe kualifikimit të propozimeve nga MKRS. Këto asete të shpallura bëjnë pjesë në dy kategori, trashëgiminë arkeologjike dhe arkitekturale.Procesi i shpalljes në mbrojtje të përhershme zhvillohet për herë të parë në Republikën e Kosovës dhe me të drejtë konsiderohet zhvillim historik për trashëgiminë e vendit tonë duke e afruar në këtë mënyrë edhe më shumë anëtarësimin e Kosovës në UNESCO si dhe mekanizmat e nismat e tjera ndërkombëtare. Njëkohësisht ofron mbrojtje ligjore të nevojshme për ruajtjen e trashëgimisë kulturore duke u bazuar dhe mbështetur në kriteret profesionale të përcaktuara në legjislacionin vendor dhe atë ndërkombëtar”, thuhet në njoftim.
