Nipi që i gëzon zemrën i dha lajmin më të hidhur: ‘Babai vdiq nënë…’ - Bota Sot
Nipi që i gëzon zemrën i dha lajmin më të hidhur: ‘Babai vdiq nënë…’

Kultura

Nipi që i gëzon zemrën i dha lajmin më të hidhur: ‘Babai vdiq nënë…’

Më: 6 mars 2018 Në ora: 11:48
Foto nga Tinka Kurti

Në njërin krah ka nipin Paul.

Një djalë i gjatë, i bukur, sa burrëror në karakter, aq i dashur dhe i përzemërt.

Prania e tij është si ilaç mbi plagën e sapohapur të aktores së madhe Tinka Kurti.

Pauli është djali i Zefit, dhe i ngjan.

Në krahun tjetër, i qëndron pranë aktorja e madhe Margarita Xhepa, ndërsa aktorja Rajmonda Bulku rri me të gjatë këtyre ditëve, duke u kujdesur si të jetë vajza e saj.

Zefi, djali i aktores Tinka Kurti ndërroi jetë një muaj më parë, nga një atak kardiak.

Zemra e tij pushoi larg atdheut, në Kanada, ku kishte shkuar për të ndërtuar një jetë më të mirë, të edukonte dhe shkollonte fëmijët, e t’u falte një të ardhme të sigurt, ndërsa Shqipëria ende vuante traumën e tranzicionit poskomunist…, e aktorët e mëdhenj si Tinka Kurti i la pa asnjë shpërblim, pavarësisht kontributit të madh që dhanë për kinemanë, teatrin dhe kombin e tyre.

Tinka rrëfen se Paul, ai që i jepte gjyshes Tinkë përherë lajme të gëzuara, qëlloi ditën e 5 shkurtit që t’i jepte dhe lajmin më të hidhur në botë: “Po të jap lajm të hidhur nënë. Babai vdiq”, dëgjoi ajo zërin e nipit përtej telefonit. Nuk mund ta përballonte dhimbjen. Miq për kokë i qëndruan afër në atë javë.

Pasi mori këtë goditje në shpirt, më në fund vendosi të nisej për ta  përcjellë birin e saj të çmuar, pas udhëtimeve 14 orëshe me avion, ashtu e sëmurë, e me brinjë të lënduara nga një rrëzim i kohëve të fundit.

Sepse është nënë e gjyshe, Tinka Kurti  u përpoq të mbahej e fortë, dhe kryezonja e madhështisë dhe e durimit i jepte ngushëllim gruas së djalit të saj të dashur dhe fëmijëve.

Nënat pranojnmë ta mbajnë të gjithë peshën hidhërimit vetë. Zefi, djali i vetëm i Tinka Kurtit nuk është më.

Çfarë Tinka tregonte me detaje, janë vetëm dhimbje, lëndim, që nuk e pa me sy në çastin e fundit të jetës.

Që e priste të vinte në Shqipëri këtë pranverë. Që punoi aq fort të shkollonte dhe edukonte fëmijët dhe ata u bënë shumë të zotë.

Por ja që nëna Tinkë, mendonte se i biri e meritonte t’u gëzohej arritjeve të fëmijëve, por s’mundi.

E sheh Paulin në sy dhe arrin të buzëqesh falë pranisë së tij.

“Është arkitekt”, thotë dhe tregon sesi fëmijët e Zefit, jo vetëm që kanë bërë shkolla prestigjioze në Amerikë, por kanë qenë edhe të suksesshëm në karrrierën e tyre. “Nipi i vogël ka marrë Medalje Ari, -thotë Tinka, -dhe është ky moment i rrallë që aktores ia sheh sytë e qeshur. “Ah ju gazetarët, merreni  me brinjët e mia, nuk shkruani për këta të rinj, për këto suksese.” Dua ta pyes më tepër, por më mbyllet goja para lotëve të saj…   

Në një ekran, ku shpalosen fotot me kujtimet më të bukura të të birit,  syri të sheh aktoren Tinka Kurti shumë të re, e të lumtur, para 65 vjetësh, në çastin më të gëzuar të jetës së saj. Ka lindur Zef Kurti.

E ndante lumturinë me bashkëshortin Palok Kurtin. Edhe ai iku herët nga jeta, dhe pesha e dhimbjes qëndron e gjitha mbi zemrën e Tinkës.  E madhja lumturi bën aq shumë kontrast me dhimbjen e tanishme.

Si t’i flasësh, çfarë ta pyesësh, si ta ngushëllosh nënën Tinkë, kur lotët rrjedhin sa herë ajo ndesh realitetin e mbramë. Biri i saj i vetëm Zefi nuk është më. Nipi Paul është i vetmi njeri që i rikthen në fytyrë një buzëqeshje të pavetëdijshme Tinka Kurtit.

Përfytyrimi i saj sillet nga fëmijëria e deri në burrërimin e djalit. Ndoshta kujton sesi ai nisi të ngjitej në skenë, duke luajtur si aktor me disa  shfaqje në  teatrin “Migjeni” të Shkodrës.

Ndoshta emocionohet kur ai mori pjesë me rolin e Lekës në filmin “Udhëtim në pranverë” në vitin 1978.

Ndoshta kujton bisedat e gjata, ku jeta e tij do të merrte një tjetër rrugë nga ajo e aktrimit dhe ajo e ka bekuar em lirinë e zgjedhjes.

Eshtë krenuar me djalin sepse kishte një familje të plotë, dinjitoze dhe të bukur, se punonin  me ndershmëri.

Një nënë me zemër të madhe si Tinka Kurti u gëzohet virtyteve të të birit dhe nuk luste gjë tjetër në botë veç jetës së gjatë… Ah, plagë mbi plagë erdhi kjo vdekje.

Më 23 janar aktorja e madhe Tinka Kurti u shtrua në spital, për shkak se vuante nga një infeksion pulmonar, ku u zbuluan dhe pasojat e një rrëzimi, që kishin rezultuar me thyerjen e dy brinjëve.

Dhe pas gjithë këtyre, dhimbja e trupit të saj i duket e vogël. Ngushëllimi për një nënë që humbet të birin mbase është i pamjaftueshëm, por  le të bëhet shenjë lehtësimi e gëzimi fakti që që të dy nipërit e saj, e nderojnë emrin e Shqipërisë, me sukseset dhe medaljet e tyre të arta.

Nipërit e Tinka Kurtit janë pinjollët më të rinj të derës së kompozitorit të shquar Palok Kurti (1860-1920) dhe birit të tij Lec Kurti (1884-1948), kompozitorit dhe diplomatit të shquar shkodran.  Pema e jetës lulëzon kaq e bukur në familjen Kurti.

Image
Image
Image

 

 

 

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
test