Ish- përfaqësuesi politik i Ushtrisë Çlirimtare të Kosovës (UÇK), politikologu Bardhyl Mahmuti, ka bërë thirrje që lufta e drejtë e UÇK-së të mbrohet si tërësi e jo duke hedhur “përgjegjësinë” mbi të tjerët.
“Turpi i mbuloftë ata që shpifin kundër veprimtarëve të mirënjohur të çështjes kombëtare”, ka shkruar Mahmuti në llogarinë e tij në “Facebook”.
Postimi i plotë:
Të gjitha rrugët çojnë në Romë !
Kur lexoj akuza reciproke të veprimtarëve të çështjes kombëtare, kur dëgjoj se janë drejtuar gishtat njëri kundër tjetrit për të fajësuar me qëllim që “të shpëtojnë veten e tyre”, habitem se si harrojnë atë proverbin e moçëm latin: omnibus viis Romam pervenitur!
Lufta e drejtë e UÇK-së mbrohet si tërësi e jo duke hedhur “përgjegjësinë” mbi të tjerët! Fajësimi i të tjerëve, sidomos i atyre që janë të pastër si loti, është logjikë e shërbimeve sekrete antishqiptare me qëllim që të konfirmohet “fajësia e UÇK-së”!
Turpi i mbuloftë ata që shpifin kundër veprimtarëve të mirënjohur të çështjes kombëtare!
Sidoqoftë, nuk do të doja të takoheshim në Romë!
