Ymeri: Sulmi ndaj deputetit Petroviq i orkestruar nga Vuçiq - Bota Sot
Ymeri: Sulmi ndaj deputetit Petroviq i orkestruar nga Vuçiq

Lajme

Ymeri: Sulmi ndaj deputetit Petroviq i orkestruar nga Vuçiq

Më: 20 mars 2019 Në ora: 17:27
Visar Ymeri

Deputeti i partisë Socialdemokrate, Visar Ymeri, ka reaguar pas sulmit që i është bërë sot deputetit të Kuvendit të Kosovës Sllobodan Petroviq. Ka thënë se një veprim i tillë lidhet drejtpërdrejt me politikën e aparatit shtëtëror të Serbisë, që drejtohet nga Aleksandër Vuçiq.

“Sllobodan Petroviqi njihet si politikan që promovon një politikë të bashkëjetesës me shqiptarët në Republikën e Kosovës. Ai është sulmuar disa ditë pasi që është linçuar publikisht si « tradhtar i popullit serb » nga Vuçiqi dhe nga strukturat propaganduese politike e mediatike të orkestuara e të dirigjuara nga Presidenti i Serbisë”, shkruan Ymeri.

Reagimi i plotë i tij:

Sulmi i sotëm ndaj deputetit të Kuvendit të Republikës së Kosovës, Sllobodan Petroviq, i cili është edhe kryetar i Partisë Liberale Serbe, është produkt i drejpërdrejtë i politikës së presionit, shantazhit dhe kërcënimeve kundër serbëve të Kosovës, nga ana e aparatit shtetëror të Serbisë, që drejtohet nga Presidenti i atjeshëm, Aleksandër Vuçiqi.

Sllobodan Petroviqi njihet si politikan që promovon një politikë të bashkëjetesës me shqiptarët në Republikën e Kosovës. Ai është sulmuar disa ditë pasi që është linçuar publikisht si «tradhtar i popullit serb» nga Vuçiqi dhe nga strukturat propaganduese politike e mediatike të orkestuara e të dirigjuara nga Presidenti i Serbisë.

Institucionet e Republikës së Kosovës duhet urgjentisht t’i ngrisin masat e sigurisë për shtetasit e Republikës së Kosovës të përkatësisë etnike serbe, sidomos të personaliteteve publike, të cilët nuk i përshtaten politikës së Partisë Progresive Serbe (SNS) të Aleksandër Vuçiqit dhe të satelitit të saj në Kosovë: Listës Serbe.

Pas vrasjes së kryetarit të Iniciativës Qytetare – SPD, Oliver Ivanoviq, sulmi fizik ndaj Sllobodan Petroviqit është produkti i radhës i politikës së dhunshme shtetërore të Serbisë ndaj politikanëve serbë të Kosovës, të cilët nuk pajtohen me Presidentin e gjithëpushtetshëm në Beograd.

Sikurse dje Millosheviqi, Aleksandër Vuçiqi po e përdor sot Kosovën dhe shqiptarët edhe për t’i njollosur oponentët e tij politik serb, me qëllim që ta forcojë pushtetin e tij autoritar në Beograd.

Diplomacia ndërkombëtare, e veçanërisht Bashkimin Evropian, duhet ta rrisin presionin ndaj Presidentit Vuçiq, për ta ndaluar urgjentisht dhunën e shtetit të Serbisë ndaj serbëve të Kosovës dhe për ta ndërprerë përhapjen e gjuhës së urrejtjes dhe të linçimit publik të rivalëve të tij politikë.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...