Para rreth 20 mijë personave të mbledhur në Nish për shënimin e kësaj ngjarjeje që në Serbi konsiderohet tragjedi, foli presidenti serb, Aleksander Vuçiq.
Me tone nacionaliste, Vuçiq tha se askush nuk do ta lejojë askënd të shkelë mbi lirinë dhe pavarësinë e Serbisë.
“Për pesë vite rradhazi ne shënojmë agresionin NATO-s ndaj një shteti të vogël, të lirë dhe asnjëherë pushtues”, filloi fjalimin e tij Vuçiq.
Sipas tij, në ato momente të vështira, askush nuk i qëndroi pranë shtetit serb.
“Ne nuk kishim miq në atë kohë. Faleminderit atyre që nuk ishin kundër nesh, mirëpo askush nuk na ndihmoi”, citohet të ketë thënë presidenti serb.
Siç u shpreh Vuçiq, Serbia u konfrontua me aleancën më të fortë ushtarake, me një aleancë të pasur dhe të fuqishme, me 22 tonë të bombave që sipas tij kishin vetëm një qëllim: mposhtjen e Serbisë, shkatërrimin e saj dhe marrjen e territorit për t’ia dhënë dikujt tjetër.
Në vazhdën e fjalimit të tij, Vuçiq tha se nuk do të lejojë të cënohet siguria e serbëve të Kosovës.
Madje sipas tij serbët e Kosovës po e mbajnë gjallë emrin e tyre dhe atë se çfarë përkasin.
Ai ripërsëriti edhe njëherë se shkaku i ngjarjeve të 24 marsit, Serbia do të qëndrojë neutrale dhe nuk do aspirojë asnjëherë anëtarësimin në NATO.
E kujtojmë se pikërisht Vuçiq po përballet me protesta masive në Serbi kundër siç e quajnë ata “diktaturës” së instaluar në këtë shtetë.
Çdo të shtunë, protestuesit mblidhen në sheshet kryesore të Beogradit për të kundërshtuar politikat e Vuçiqit, njeriut që po vlerësohet se i ka rënë dukshëm përkrahja në popullin serb.