Ish presidenti i Kosovës dhe ish kryetar i LDK-së, Fatmir Sejdiu, ka komentuar marrëdhëniet e tij me kryetarin e Podujevës, Agim Veliu.
I pyetur se a ka afërsi me kryetarin e Podujevës, Agim Veliu, ish-presidenti, ka thënë se ai tashmë ka afërsi me të gjithë zyrtarët e lartë të Lidhjes Demokratike.
Por, Sejdiu e pranoi se ka ekzistuar një periudhë ku shumë personalitete brenda LDK-së, nuk i kanë folur, pasi që sic tha ai janë frikësuar nga hakmarrja e krerëve të partisë.
“Unë kam afërsi me të gjithë. Tash nëse flasim me gjuhën e barcoletave në një periudhë janë frikësuar të më flasin”, tha Sejdiu, teksa është pyetur se a është Veliu ndër personat që nuk kanë pasur guxim që t’i flasin në një periudhë të mëhershme. Mirëpo, Sejdiu u përgjigj se për këtë gjë nuk dëshiron të flasë me emra.
“Nuk dua të flas me emra”, ka përfunduar Sejdiu në Dukagjini.
Fatmir Sejdiu, në këtë emision nuk e ka përjashtuar mundësinë që të kandidojë sërish për ta marrë ‘timonin’ e Lidhjes Demokratike të Kosovës.
Ai u shpreh se tani për tani, nuk ka vendosur ende, dhe se do të shikojë ecurinë e ngjarjeve brenda LDK-së.
