Përfaqësuesi special i ShBA-ve për Ballkanin Perëndimor Metju Palmer ka deklaruar se iu mbetet Beogradit dhe Prishtinës të caktojnë parametrat për dialog, duke shtuar se njohja e ndërsjellë do të ishte përfundimin ideal i procesit të bisedimeve, shkruan “Blic” transmeton “Bota Sot”.
“Iu mbetet palëve që të caktojnë parametrat për dialog” ka thënë Palmer për portalin e Brukselit "Euobserver", në pyetjen rreth planit të korrektimit të kufijve.
ShBA mbështesin të dy palët që të gjejnë mënyrën që të kthehen në tavolinën e bisedimeve, që të bisedojnë për këto çështje dhe të gjejnë mënyrën të ecin përpara drejt normalizimit të raporteve, tha Palmer duke shtuar se njohja e ndërsjellë do të ishte ideale.
“Do të dëshironim që njohja e ndërsjellë mes Kosovës dhe Serbisë të jetë rezultat i procesit të bisedimeve” tha Palmer.
Palmer nuk ka dashur të përgjigjet në pyetjen shtesë rreth qëndrimit të ShBA-ve për korrektimin e kufijve që kundërshtohet nga qëndrimi gjerman që thotë se kjo mund të destabilizoj regjionin.
