Virusi korona ka prekur 12 persona në Veri, ndërsa një ka vdekur. E që ky numër mos të rritet, Agim Bahtiri e Goran Rakiq kanë dalë në një konferencë të përbashkët për media, të cilët kanë kërkuar të respektohet të gjitha rekomandimet e IKSHPK’së.
Agim Bahiti e Goran Rakiq bëjnë thirrje që të respektohen rekomandimet e IKSHPK-së
Koronavirusi i ribashkoj përsëri.
Të enjten në mbrëmje, kryetari i Mitrovicës Jugore Agim Bahtiri dhe ai i Mitrovicës Veriore Goran Rakiq, dolën në një konferencë të përbashkët për media bashkë me komandantin e KFOR-it, Michele Risi.
Ngjarja u zhvillua mbi urën e lumit Ibër.
Këtu u bë thirrje për të gjithë qytetarët që t’i respektojnë rekomandimet e IKSHPK-së.
Deri sa Jugu i Mitrovicës është i qetë sa u përket rasteve me koronavirus, njëjtë nuk mund të thuhet edhe për Veriun.
Por, ka qenë shefi i të ashtuquajturës zyre për Kosovë, në Qeverinë e Serbisë, Marko Gjuriq, ai që ka njoftuar se në këtë zonë tashmë janë prekur të paktën 12 persona nga COVID-19.
Gjuriq, gjithashtu ka treguar se 7 ekspertë shëndetësorë kanë mbërritur në Kosovë nga Instituti Batut i Beogradit, për ti ndihmuar serbet.
Edhe kryetari i Komunës së Leposaviqit, Zoran Todiq, në një prononcim për media lokale, ka bërë të ditur se edhe në qytetin që ai e udhëheq, ka të prekur me virusin korona.
E në një bisedë telefonike me T7, Faik Hoti nga Ministria e Shëndetësisë ka thënë se përveç dy rasteve të para në veri që nuk janë raportuar, të gjitha rastet tjera figurojnë në numrin e përgjithshëm të të prekurve me COVID 19 në Kosovë.
Ndryshe, qytetarët e Mitrovicës Veriore nuk e respektojnë orarin e kufizimit të lëvizjes nga qeveria e Kosovës, por nga ajo e Serbisë
Ndërsa në Mitrovicën Jugore, sipas drejtoreshës së Shëndetësisë Erseka Barani, nuk ka të infektuar me këtë sëmundje.
Sipas Baranit, Komuna e Mitrovicës së Jugut ka bërë të gjithë përgatitjet për tu përballur me virusin Korona.
