Me ftesën e Grupit Parlamentar të PDK-së, ka pasur një dakordim të gjerë të partive në Kuvendin e Kosovës për të miratuar Projektligjin për Mbrojtjen e Vlerave të Luftës së UÇK-së.
Projektligji i propozuar nga Partia Demokratike e Kosovës, parasheh përcaktimin e obligimit institucional dhe qytetar për mbrojtjen e vlerave të luftës së UÇK-së.
Ndaj kësaj iniciative së fundmi ka reaguar edhe Ambasada e Zvicrës në Kosovë.
Përmes një njoftimi në faqen zyrtare në Facebook, ambasada e Zvicrës në Kosovë thotë se është e brengosur që Projektligji i propozuar të “minojë lirinë e shprehjes”.
Zvicra thotë se politikanët e Kosovës duhet të gjejnë mënyra tjera për të shprehur respektin ndaj UÇK-së.
Njoftimi i plotë
“Pa përjashtuar të drejtën për të treguar respekt ndaj UÇK-së dhe anëtarëve të saj, Zvicra është e brengosur që Ligji i propozuar për Mbrojtjen e Vlerave të Luftës së UÇK-së mund të minojë lirinë e shprehjes që është një e drejtë themelore e njeriut. Ligji i propozuar mund të frikësojë disa qytetarë të Kosovës dhe të pengojë proceset e tjera që kanë për qëllim trajtimin e së kaluarës. Zvicra inkurajon krerët dhe politikanët e Kosovës të gjejnë mënyra tjera për të treguar respektin ndaj UÇK-së”.
Kujtojmë edhe ambasada e SHBA-së ka kritikuar shtyrjen para të këtij projektligji.
“Është mënyrë e gabuar për të treguar respekt për UÇK-në”, kishte deklaruar ambasadori i Shteteve të Bashkuara të Amerikës në Kosovë, Philip Kosnett.
