Prokuroria e Specializuar e Kosovës sot në Hagë mban konferencë në lidhje me ecurinë e rastit të Salih Mustafës, i arrestuar kohë më parë për krime lufte, transmeton "Bota sot".
Në njoftimin e publikuar në faqen e Gjykatës Speciale bëhet e ditur se në këtë konferencë do të flasë prokurori Jack Smith nga ora 15:00.
Në seancën e parë, janë lexuar akuzat që e përfshijnë Salih Mustafën në vrasje, tortura, trajtim çnjerëzor të të ndaluarve në një kamp ndalimi në fshatin Zllashë më 1999.
Aktakuza kundër Salih Mustafës u konfirmua më 12 qershor 2020. Ai u arrestua nga Zyra e Prokurorit të Specializuar më 24 shtator dhe u transferua në objektin e paraburgimit të Dhomave të Specializuara të Kosovës në Hagë, më të njëjtën ditë.
Aktakuza e ngarkon Salih Mustafën me përgjegjësi penale individuale për ndalim arbitrar, trajtim mizor, torturë dhe vrasje të paligjshme, që janë krime lufte sipas të drejtës ndërkombëtare.
