Rrahja brutale e gruas në një market në Prishtinë, Policia e cilëson si “lëndim i lehtë trupor”

Lajme

Rrahja brutale e gruas në një market në Prishtinë, Policia e cilëson si “lëndim i lehtë trupor”

Më: 26 tetor 2021 Në ora: 09:17
Burri

Policia e Kosovës në raportin 24 orësh të së hënës, ka njoftuar për një rast të cilësuar si “Lëndim i lehtë trupor”, që ka ndodhur mesditën e së dielës në Prishtinë.

Në raportin e policisë, është bërë e ditur se rasti ka ndodhur të dielën në orën 14:20.  

Sipas këtij raporti, sulmi fizik ka ardhur pas një mosmarrëveshjeje.

Viktima në këtë rast ka pësuar lëndime trupore dhe është dërguar për tretman mjekësor në Qendrën Klinike Universitare të Kosovës.

Ndërkaq i dyshuari, me urdhër të prokurorit është dërguar në mbajtje.

“LËNDIM I LEHTË TRUPOR-Prishtinë, 24.10.2021 – 14:20. Është arrestuar i dyshuari mashkull kosovar, pasi që pas një mosmarrëveshje ka sulmuar fizikisht viktimën femër kosovare. Viktima ka pësuar lëndime trupore dhe është dërguar për tretman mjekësor në QKUK, ndërsa i dyshuari me vendim të prokurorit është dërguar në mbajtje”, ka bërë të ditur policia.

E ky “lëndim i lehtë trupor”, tronditi Kosovën mbrëmjen e së hënës.

Nga Sinjali u publikua video e këtij rasti, ku i dyshuari shihet duke goditur me grushte në fytyrë një grua në një market në Prishtinë.  

Krejt kjo kishte ndodhur në prezencë të bashkëshortes dhe fëmijëve të të dyshuarit.

Më pas, media publikoi një video tjetër, derisa i dyshuari nën shoqërim të sigurimit të marketit, ofendon gratë tjera që gjenden në market, në momentin që ato e kritikojnë për sjelljen e tij ndaj një gruaje.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat