Petter Stordalen, pronar i Nordic Choice Hotels, e bëri këtë njoftim nëpërmjet një postimi në “Tuiter”, pak ditë më parë, kur shkruante se ofronte fjetje për “emigrantët e përkohshëm që kanë nevojë”
Një biznesmen norvegjez, i cili ka në pronësi një nga rrjetet më të mëdha të hoteleve në Skandinavi, ka ofruar për emigrantët që mbërrijnë në vendin e tij 5 mijë dhoma falas.
Petter Stordalen, pronar i Nordic Choice Hotels, e bëri këtë njoftim nëpërmjet një postimi në “Tuiter”, ku shkruante se ofronte fjetje për “emigrantët e përkohshëm që kanë nevojë”.
Stordalen ua ka bërë të ditur ofertën e tij autoriteteve të emigracionit në Norvegji. Ata janë përgjigjur se e vlerësojnë ofertën e biznesmenit dhe “do t’i përdorim hotelet e tij nëse situata është urgjente”.
“Gjëja më e rëndësishme tani për tani është gjetja e një strehe afatgjatë për refugjatët”, i ka thënë gazetës “Newsweek” Christine Wilberg, drejtuese e Departamentit për Pritjen e Emigrantëve.
Stordalen u ka thënë medieve vendase se drama e refugjatëve në Europë i shqetëson të gjithë dhe ka shtuar se do të mbulojë edhe shpenzimet e ushqimit për refugjatët që strehohen në hotelet e tij.
Stordalen e ka themeluar rrjetin e hoteleve “Nordic Choice Hotels” në vitin 1990 dhe sipas revistës “Forbes”, vlera e tyre arrin në 1.53 miliardë dollarë, çka e ka vendosur atë në vendin e shtatë të listës së më të pasurve në Norvegji.
Sipas statistikave të autoriteteve vendase, numri i kërkesave për azil në Norvegji pritet të arrijë në 16 000 deri në fund të vitit 2015, ndërkohë që një vit më parë atje kërkuan azil 11 480 të huaj.
