Presidenti i Serbisë Aleksandar Vuçiq është kapur me eksponentë të Kishës Ortodokse të cilët dolën kundër ndarjes së Kosovës. Vuçiq akuzoi ata se po kundërshtojnë ndarjes pasi po i duan nga shteti i rrejshëm i Kosovës 650 mijë euro.
Por, Sava Janjiq abat në Manastirin e Deçanit ka thënë se nuk bëhet fjalë për financim apo ndihmë duke sqaruar se bëhet fjalë për para të qirasë për objektet e Agjencisë Antikorrupsion në Prishtinë që thonë se janë pronë e Kishës Ortodokse.
Janjiq ka folur për Europën e Lirë rreth kësaj çështjeje ku ka thënë se bëhet fjalë për shfrytëzimin shumëvjeçar të objekteve dhe qiraja duhet të paguhet për vitet paraprake.
“Qeveria e Kosovës ka pranuar të paguaj diku rreth 200 mijë e diçka euro, por shuma tjetër e parave nuk është paguar. Pra nuk bëhet fjalë për asnjë lloj ndihme nga Qeveria e Republikë së Kosovës por për qiranë për shkak të uzurpimit të të objektit të Kishës, që dikur ishte shkollë e kishës e ku sot punon Agjencia kundër Korrupsionit”.
Ai ka thënë se qeveria e Kosovës ka pranuar të paguaj një pjesë të parave duke falënderuar ambasadat, veçmas asaj të Ambasadës së SHBA’së.
Ai ka thënë “larg saj” që Kisha të financohet nga Qeveria e Kosovës. Janjiq ka thënë se Qeveria e Kosovës është kritikuar që i jep para Bashkësisë Islame të Kosovës.
