Deputetët nuk e pranojnë Vidovdanin si festë zyrtare në Kosovë - Bota Sot
Deputetët nuk e pranojnë Vidovdanin si festë zyrtare në Kosovë

Lajme

Deputetët nuk e pranojnë Vidovdanin si festë zyrtare në Kosovë

Më: 17 tetor 2018 Në ora: 11:08
Komisioni për Administratë Publike

(E plotësuar) - Lista Serbe ka kërkuar që në Ligjin për festat zyrtare të futet edhe data 28 qershori, që njihet si Vidovdani. Mirëpo, këtë e kanë kundërshtuar anëtarët e Komisionit për Administratë Publike, Qeverisje lokale dhe Media.

Përveç 28 qershorit, Lista Serbe ka kërkuar që të kenë festë memoriale edhe ditën e shtetësisë së Serbisë 15 shkurtin.

Megjithatë, komisioni e ka përcjellë këtë projektligj në Kuvend, por me një vërejtje rreth propozimit të 28 qershorit.

Kryetari i këtij komisioni, Nait Hasani, ka thënë se festa e Vidovdanit është e papranueshme për ta si komision, madje ai ka propozuar që edhe disa festa që janë aktualisht  të largohen nga ligji.

Po ashtu, ai ka bërë të ditur se është kërkuar që edhe data 24 qershor të jetë dita e egjiptianëve.

Hasani: Festa e 28 qershorit e Vidovdanit për mua është e papranueshme

“Festa e 28 qershorit e Vidovdanit për mua është e papranueshme, sepse nuk është një festë e cila i përmbledhë listat e festave që i kemi shti ne si festa zyrtare. Është festa e Bajramit të Madh dhe të Vogël, Krishtlindjeve Katolike, Ortodokse. Në listën e festave zyrtare këto festa janë hy dhe nuk kemi festa fetare të tjera që hyjnë në këtë...Ne si komision nuk jemi në gjendje që të marrim një vendim për çështjen e 28 qershorit ditës së Vidovdanit ta vendosim si festë memorialë apo jo. Për mua, personalisht mendoj që edhe festat të cilat janë festat fetare ne jemi shtet laik dhe nuk duhet me qenë pjesë e festave, sidomos festat e bajramit, krishtlindjeve, pashkëve, janë festa individuale të komunitetit të cilët mund t’i festojnë. Unë kisha propozuar që edhe Dita Ndërkombëtare e Punës 1 maji të hiqet dhe Dita e Evropës po ashtu”, tha  Hasani.

Anëtarja e komisionit nga Lista Serbe, Jasmina Zhivkoviq, ka thënë se i kanë propozuar këto data pasi që vetëm serbët dhe egjiptianët nuk i kanë pasur këto ditë në ligj. Ajo ka thënë se propozimi i tyre për ditën e 28 qershorit, nuk është asnjë provokim.

Zhivkoviq: Nuk kemi për qëllim që të ketë reagim negativ

“Njihet botërisht që 28 qershori është festë që e festojnë serbët dhe e dimë që kjo datë lidhet me luftën e Kosovës nga 1389 dhe po ashtu, ka të bëjë me festën fetare. Por, nuk është kjo vetëm festë fetare, dihet se çdo vit 28 qershori organizohet festimi edhe në Kosovë në Gazimestan, vendi ku shënohet lufta e Kosovës. Nuk ka asnjë qëllim që kjo të jetë diçka e re apo të shkaktojë ndonjë reagim negativ, por e kundërta është që kjo e lidh edhe më tepër për atë që ka ndodhur historikisht dhe prandaj ekzistojnë perceptime të ndryshme dhe të dhëna historike”, tha Zhivkoviq.

Anëtari i Nismës Socialdemokrate, Milaim Zeka, është shprehur se nuk ka asgjë kundër festave të serbëve që këta t’i festojnë në shtëpitë e tyre.

Por deputeti i Nismës e ka bërë edhe një krahasim mes Vetëvendosjes dhe Listës Serbe që sipas tij këto të dyja nuk e pranojnë flamurin as himnin e Kosovës.

Zeka: VV e Lista Serbe nuk e pranojnë shtetin e Kosovës

“Veç sa nuk e kemi caktuar një ditë feste për syneti, do të thotë nuk ka festë e bëjmë edhe për syneti dhe e plotësojmë. Problemi i Listës Serbe edhe i Vetëvendosjes në këtë vend është se asnjëra nuk e pranojnë shtetin e Kosovës, as himnin, as flamurin. Mbi bazën e kësaj kur ju uleni dhe e drejtoni kryet nga Prishtina jo kah Beogradi, kur e pranoni shtetin e Kosovës, flamurin e Kosovës, himnin e Kosovës atëherë mund të ulemi dhe të bisedojmë edhe për festa të tilla. Ju po thoni që nuk është provokative, unë po them që është shumë provokative, është tepër provokative edhe tepër fyese për shqiptarët të cilët jetojnë në Kosovë kur bashkëqytetarët e tu vijnë nga Beogradi me fotografi të Millosheviqit, me fotografi të Mlladiqit, që kanë bërë masakra e kanë vrarë njerëz, edhe shqiptarët kanë vra ajo luftë ka qenë. Ju na i keni vra 14 mijë, na i kemi vra 1 mijë e 400, nuk kemi mundur më shumë se edhe ne su xhuk ju kishim bë, po nuk kemi mundur”, tha Zeka.

Pas këtij krahasimt ka reaguar deputeti i VV-së, Adem Mikullovci, duke thënë se është absurde një krahasim i tillë.

Mikullovci: Vërtet është absurde me e krahasua Vetëvendosjen me Listën Serbe

“Vërtet është absurde dhe e pahijshme që me e krahasua Vetëvendosjen me Listën Serbe. Unë dua të them këtë, nuk jam i çuditur fort nga Lista Serbe propozimi që ka për festimin e 28 qershorit, mua po më çuditë Qeveria jonë, kryetari i Kuvendit pse një propozim të tillë me na e pru neve në komision. Me çfarë të drejte lyp ai prej neve na me e bë zyrtare një festë  të shtetit fqinj me festua edhe ne. Është nënshkrimi i kryetarit. Zonja tha që nuk është ngacmuese, por mjafton të kujtohet kur ne gjithmonë e jetë jam çuditur pse serbët e festojnë Vidovdanit, pse festohet humbja. Një festë të tillë të kërkohet të hyj në festat shtetërore të Kosovës për mua është absolutisht absurdi më i madh. A duhet me shti në festë edhe Recakun, edhe Kosharen, bile këto janë fitore nuk janë humbje. Unë vetëm shprehi mllefin tim për propozimin a nuk e votoj i gjallë”, tha Mikullovci.

Por, një sqarim i ka dhënë përsëri deputeti i Nismës Milaim Zeka, duke thënë se e ka bërë krahasim për ata që nuk e respektojnë himnin dhe flamurin e Kosovës.

Zeka: VV nuk e pranon himnin, flamurin

“Unë nuk e krahasova VV, thash është një problem që VV nuk e pranon himnin, flamurin, kur këndohet himni i Kosovës ju nuk ngriteni në këmbë. Më fal në qoftë se ti e ke marrë si krahasim unë të kërkoj falje”, tha ai.

Për këtë krahasim reagoi edhe deputetja e Listës Serbe, Jasmina Zhivkoviq, e cila tha se propozimi i kësaj feste nuk është provokim ndërsa krahasimin e subjektit të saj politik me VV-në e quajti absurd.

Zhivkoviq: Krahasimi me VV është absurd

“Përmendja e Listës Serbe në kontekstin negativ dhe krahasimi me Vetëvendosjen është absurd. Për fat të keq fakti çdo propozim që vije nga Lista Serbe vije si provokim dhe menjëherë në fillim refuzohet pa arsye. Por, edhe kjo është e drejtë sepse jemi në një demokraci të ashtuquajtur dhe çdo kush ka të drejtë për mendimin e vet dhe të votoj si të dojë dhe shumica e Qeverisë dhe me votat e shumicës votohet edhe në komision edhe në Kuvend. Por, dua të them që kjo është një pasqyre negative dhe thirrja për pranimin e diçkaje duhet të ketë edhe derë të hapur për pranim në mënyrë që të pranohet nga ana tjetër dhe që mos të pranohet vetëm si provokim”, tha ajo.

Edhe deputetët e tjerë e kanë kundërshtuar që në ligjin për festa zyrtare të futet 28 qershori, ku një ndër ta ka qenë edhe deputeti i AAK-së Rasim Selmanaj, i cili ka thënë se nuk e voton as në komision e as në Kuvend.

Selmanaj: Unë as këtu as në Kuvend nuk e përkrahi

“Ne nuk po diskutojmë që serbët në Kosovë mos me e pas një ditë memoriale të tyre, ne po e kontestojmë datën 28 qershor dhe jemi kundër. Për shkak se ngjallë edhe debat edhe provokim. Ju mund ta keni një datë tjetër dhe do ta kishim përkrahur sikur për të gjithë të tjerët, por jo për këtë datë. Unë as këtu as në Kuvend nuk e përkrahi që 28 qershori pra dita e Vidovdanit me qenë festë memorialë e serbëve”, tha ai.

Në këtë komision është bërë Shqyrtimi i raporteve të komisioneve të përhershme për Projektligjin për lirinë e asociimit në Organizatat Joqeveritare.

***

Komisioni për Administratë Publike ka shqyrtuar në parim projektligjin për ndryshimin dhe plotësimin e ligjit për festat zyrtare në Kosovë.

Lista Serbe ka kërkuar që në Ligjin për festat zyrtare të futet 28 qershori që njihet si festa e Vidovdanit.

Mirëpo, këtë e kanë kundërshtuar anëtarët e Komisionit. Deputeti Milaim Zeka këtë kërkesë e ka quajtur fyese për shqiptarët.

 "Nuk kam kurrgjë kundër festave serbe. Vetëm sa nuk kemi bërë festë për syneti. VV dhe Lista Serbe nuk e pranojnë shtetin e Kosovës. Është shumë provokative dhe tepër fyese për shqiptarët që jetojnë në Kosovë kur bashkëqytetarët e tu vijnë në Kosovë me fotografi të Millosheviqit. Ju na i keni vra një numër të madh të qytetarëve edhe ne pak. Nuk kemi pas mujt më shumë se suxhuk iu kishm bë", tha ai.

Deputeti i VV Adem Mikullovci i ka kthyer përgjigje Zekës duke thënë se nuk është e hijshme që të bëhet krahasimi me Listën Serbe.

“Nuk është aspak e hijshme me e krahasua Vetëvendosjen me Listën Serbe. Nuk e votoj i gjallë", tha ai.

 Megjithatë Milaim Zeka, tha se nuk e ka krahasuar por ka thënë se as VV  nuk i respekton simbolet e Kosovës.

"VV nuk e respekton himnin e Kosovës, nëse ti e ke marrë ashtu kërkoj falje", tha ai.

Edhe deputeti i AAK, Rasim Selmanaj e ka kundërshtuar futjen e 28 qershorit si festë zyrtare.

"Kolegia nuk ka pse të ndihet keq. Ne po e kundërshtojmë 28 qershorin se ngjallë debat. Ky debat po është në suaza normale. Edhe unë personalisht nuk e përkrahi që 28 qershori të jetë festë", tha ai. Në fund ky projektligj i është dërguar për seancë me rekomandimin që të hiqet festa e 28 qershorit.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...