Kryetari i të ashtuquajturit Komisioni parlamentar i Serbisë për Kosovë, Millovan Drecun ka thënë se pret që Rrustem Mustafa i njohur si Komandant Remi të jetë nga të akuzuarit e Gjykatës Speciale.
Drecun i tha Tanjugut se Remi është “veçanërisht interesant për zyrën e prokurorit të specializuar”, sepse sipas tij, “shumë krime janë kryer në zonën e tij të përgjegjësisë, por ka pasur edhe shumë burgje të paligjshme”.
Arianit Koci, avokati i të ftuarit të parë të Gjykatës Speciale, Rrustem Mustafës, ka njoftuar të enjten se klienti i tij do të marrë pjesë vullnetarisht për intervistim në Zyrën e Prokurorit të Specializuar në Hagë.
Ky konfirmim i Kocit vjen pasi Komandant Remi, është ftuar nga Gjykata Speciale për tu intervistuar më 14 janar të 2019-ës.
”Mustafa do të paraqitet vullnetarisht dhe është i gatshëm të sqarojë çdo rrethanë të cilën ZPS është duke e hetuar”, sqaron avokati i tij Arianit Koci.
