Karakteristikat që zotërojnë gratë vërtet të lumtura - Bota Sot
Karakteristikat që zotërojnë gratë vërtet të lumtura

Life style

Karakteristikat që zotërojnë gratë vërtet të lumtura

Më: 14 gusht 2020 Në ora: 11:35
Ilustrim

Ka gra që duket se kanë zbuluar sekretin e lumturisë dhe zakonisht janë gra që zotërojnë disa karakteristika të veçanta.

Deri kohët e fundit, besohej gjerësisht në mesin e psikologëve se vetëm dy tipare të personalitetit ishin vendimtare në përcaktimin e lumturisë dhe mirëqenies së një personi. Studimi psikologjik sugjeroi ekstrovertët dhe jo-neurotikët, si faktorë përcaktues për të pasur një mendje të lumtur.

Por kërkimet e reja kanë vënë gjithçka në pyetje. Nuk është aq e lehtë për të arritur lumturinë Profesor Scott Barry Kaufman, një nga autorët e studimit të ri, shpjegoi në një intervistë pesë tiparet thelbësore për të arritur lumturinë e dëshiruar. Gratë e lumtura i zotërojnë ato, ata kanë kryer me saktësi atë rrugë personale që i ka sjellë në arritjen e qëllimit ambicioz.

Por le të shohim në detaje se cilat janë:

1- Entuziazmi

Entuziazmi, karakteristika e parë, e domosdoshme që duhet zotëruar. Njerëzit entuziastë tentojnë të jenë më të shoqërueshëm. Ata zakonisht janë miqësorë, argëtues, të hapur dhe kanë emocione dhe marrëdhënie pozitive. Ata e dinë se si ta çmojnë atë që kanë, të shijojnë momentet e bukura të jetës dhe të shfrytëzojnë mundësitë që ofron.

2- Qetësia

Njerëzit që arrijnë të qëndrojnë të qetë, janë më të lumtur me veten dhe me të tjerët. Ata janë sigurisht pak ose aspak neurotikë, ata nuk sikletosen kollaj dhe nuk vihen poshtë nga rrethanat. Ata gjithashtu kanë një ndjenjë më të madhe të autonomisë.

3- Punëtorë

Njerëzit punëtorë janë të disiplinuar, proaktivë, të fokusuar në sukses. Ata janë këmbëngulës dhe gjithmonë përpiqen të arrijnë qëllimet e tyre duke punuar me pasion dhe këmbëngulje. Kjo çon në një mirëqenie më të madhe personale dhe emocionale.

4–Dhembshuria

Dhembshuria shkon krah për krah me dashamirësinë, simpatinë e ndjeshmërinë. Kujdesi për mirëqenien e të tjerëve do të thotë të përmirësosh vetveten. Studiuesit zbuluan se njerëzit e dhembshur janë më të lumtur dhe mirënjohës.

5- Kurioziteti intelektual

Mendimi i thellë rreth çështjeve komplekse dhe angazhimi i trurit në mendimin filozofik dhe intelektual mund të nënkuptojë një vetë-pranim më të madh, autonomi, rritje personale, qëllim dhe përmbushje.

Nuk është kaq e vështirë të inkorporohen këto pesë karakteristika në rast se nuk ekzistojnë. Duhet të përpiqemi t’i vëmë në praktikë ato në jetën tonë çdo ditë. Le të përpiqemi të jemi vërtet të lumtur!

Shfaq komentet
comments powered by Disqus
Sot mund të lexoni Shfletoni kopertinat