U shfaqën dilemat e para për Ligjin për përdorimin e gjuhëve. Dy nene nga ligji do të dërgohen në Komisionin e Venedikut për vlerësim. Zëvendëskryeministri Bujar Osmani, thotë se bëhet fjalë për dygjuhësinë tek uniformat ushtarake dhe bankënotat.
“Në komisionin e Venedikut do të dërgohen dy nene nga ligji. Këto janë përdorimi i dygjuhësisë tek uniformat ushtarake dhe te bankënotat, që u kontestuan nga partitë politike, dhe do të shihet nëse janë kushtetuese ose jo. Këto dy pjesë të ligjit do të dërgohen në Komisionin e Venecias”, tha Osmani.
Qeveria erdhi në konkludim që ministria e Drejtësisë përmes ministrisë së Punëve të Jashtme të kërkojë mendim nga Komisioni i Venedikut për tekstin e ligjit dhe çështjet e hapura që nuk janë pjesë e këtij ligji, pas miratimi të ligjit nga ana e Kuvendit të Maqedonisë.
Në takim koordinativ me përfaqësues të më shumë institucioneve nuk mori pjesë zëvendëskryeministri Hazbi Lika, edhepse mori pjesë në përpilimin e këtij ligji.
“Rrethohet pjesa legjislative e marrëveshjes së Ohrit për ligjet që dalin nga amendamentet kushtetuese, që janë pjesë e Kushtetutës që nga viti 2001. Lika mori pjesë në përpilimin e këtij ligji. Tani në këtë grup ndërinstitucional marrin pjesë shumë ministri, kuvendi dhe përfaqësues nga ministria e Drejtësisë, ndërsa në të janë përfshirë gjyqësia, gjykatat, prokuroria, për shkak se është proces kompleks dhe të gjithë palët duhet të jenë të përfshirë në proces”, tha Osmani.
Plani për zbatimin e Ligjit për përdorimin e gjuhëve duhet të shqyrtohet në seancën e parë qeveritare.
