“Diçka e jashtëzakonshme sapo ka ndodhur në Ballkan. Autoritetet e Athinës dhe Shkupit i kanë përfunduar detyrimet për ndryshimin e emrit të IRJM-së në Republika e Maqedonisë së Veriut, çështje e cila pengonte të dy shtetet me dekada”.
Këtë e ka shkruar analisti amerikan James W. Pardew, i cili ka qenë edhe ndërmjetësues në arritjen e Marrëveshjes së Ohrit dhe ish-zv.sekretar i përgjithshëm i NATO-s.
Në analizën e tij të publikuar në gazetën amerikane “The Hill”, ai thotë se kryeministrat e të dy vendeve Alexis Tsipras dhe Zoran Zaev kanë punuar në interes të kombeve të tyre.
“Vendimi i tyre për të tejkaluar ekstremet, disa herë është kundërshtuar ashpër. Por, është akt i guximshëm që jep shpresë se edhe politikat e ardhshëm në Ballkan do ta kenë guximin e njëjtë”, shkruan Pardew.
Sipas tij, rëndësia e marrëveshjes për Shkupin është e madhe, por shton se edhe Athina ka dobi, pasi do të ketë fqinj stabil që do të jetë pjesë e familjes evropiane.
