Ministria e Shëndetësisë (MSH) vazhdon ta ruaj si “sekret shtetëror” emrin e ndërmarrjes së kontraktuar për analizën e fizibilitetit të Ndihmës Mjekësore të Shpejtë, sepse edhe par tre muajsh nga mbyllja e thirrjes, nuk e ka publikuar tenderi në Sistemin Elektronik për Furnizime Publike. Emri i ndërmarrjes nuk bëhet i ditur edhe pas insistimit tremujor të Portalb.mk.
Për analizën e fizibilitetit më 14 nëntor të 2018-s është mbyllur thirrja për aplikim. U njoftua se ka pasur katër oferta dhe se një ndërmarrje e ka fituar tenderin, por edhe pse u premtua nga ministri i Shëndetësisë, Venko Filipçe ende nuk janë publikuar emrat e ofertuesve dhe të kontraktuesit të kësaj analize.
“Emrin e ndërmarrjes do ta publikojmë në Sistemi Elektronik për Furnizime Publike”, u përgjigjen sot nga MSH-ja.
Këtë premtim e ka dhënë më 5 shkurt 2019 edhe ministri Filipçe.
“Ende nuk ka përfunduar. E ka fituar një ndërmarrje që ka konkurruar, me procedurë ankand elektronik, e kanë ulur çmimin, kanë afat prej 60 ditësh, të cilat ende nuk kanë kaluar”, tha ministri Filipçe.
