Ministrja e Drejtësisë Renata Deskoska, mbrëmë në emisionin “Click Plus” në TV21, ka zbuluar të ardhmen e Prokurorisë Speciale.
Ajo tha se me dy ligjet e reja që janë përgatitur, PSP-ja do të bëhet pjesë e Prokurorisë Themelore Publike.
Deskoska tha se tekstet e ligjeve janë vendosur në debat publik dhe kanë marrë sugjerime edhe nga ekspertë të jashtë, ndërsa shtoi se zgjidhja finale është më e mira.
“Për momentin është përpunuar tekst në Ministrinë e Drejtësisë, që i sublimon zgjidhjet më të mira të njërit dhe tjetrit ligj dhe në dispozitat e tyre janë përfshirë dispozita që PSP-në e themelojnë si organ të përhershëm të Prokurorisë Themelore, me disa garanci të caktuara të autonomisë së tyre. Pasi duhet të jemi të vetëdijshëm se sistemin që e lamë pas dhe që ishte arsyeja e formimit të PSP-së, mund të kthehet në çdo kohë”, tha Deskoska.
Ajo shtoi se PSP edhe pse do të jetë pjesë e PTHP-së, do të ketë autonominë e saj dhe do të veprojë me lëndë të funksionarëve të lartë shtetëror.
