Zëvendëskryeministri bullgar, Tomisllav Donçev deklaroi për gazetën “Trud” se Maqedonia e Veriut dhe Serbia dëshirojnë pjesë në centralin e ardhshëm bërthamor “Belene”.
Donçev, siç transmeton BTA, theksoi se “nuk ekziston mundësi që centrali bërthamor Belene të ndërtohet pa pjesëmarrjen e Rosatomit rus”.
Centrali bërthamor Belene planifikohet të ndërtohet në pjesën veriore të Bullgarisë, në afërsi të Danubit, për t’i zëvendësuar reaktorët e centralit bërthamor Kozloduj, të cilët janë tërhequr nga përdorimi si pjesë e plotësimit të kushteve për hyrjen e Bullgarisë në Bashkimin Evropian.
Në vitin 2010, Qeveria bullgare e ngriu këtë projekt në kohë të pacaktuar për shkak të përfitimit të pasigurt. Sipas planeve të reja të Qeverisë në Sofje, bërthamorja Belene duhet të ndërtohet në 10 vitet e ardhshme, ndërsa do të kushtonte rreth 10 miliardë euro.