Betim solemn të shërbimit vullnetar në Armatë sot dhanë 86 ushtarë të ri, mes të cilëve gjashtë vajza nga gjenerata e 37-të në kazermën “Alekso Demnievski Bauman” në Veles, para prindërve të tyre, familjarëve, miqve, përfaqësuesve të Shtatmadhorisë dhe të komandantëve dhe njësive të Armatës.
Tekstin e betimit solemn e lexoi komandanti i QTI – Qendrës për Trajnim Individual, nënkoloneli Muhamed Ibraimi, ndërsa pas tij betimin njëzëshëm e përsëritën ushtarët e ri. Ata u betuan se do t’i mbrojnë lirinë, sovranitetin, pavarësinë dhe integritetin territorial të Republikës së Maqedonisë së Veriut dhe se në mënyrë disiplinore, me vetëdije dhe me përgjegjësi do t’i kryejnë obligimet si mbrojtës të atdheut të tyre.
Betimin e dhënë me solemnitet ushtarëve të rinj ua uroi zëvendëskryeshefi i SHM-së së Armatës, gjeneral majori Azim Nuredini.
“Kemi hyrë në periudhën e ndryshimeve dhe fillimeve të reja, këtë vit flamuri ynë u gjet në tryezën e NATO-s. Hapërojmë drejt të ardhmes si pjesë e familjes së Aleancës Veriore Atlantike. Por që të bëhemi anëtare me të drejtë të plotë, na presin sfida dhe shumë punë. Këtë vit kemi shumë aktivitete dhe njëra prej tyre është zgjedhja e vajzave dhe djemve të rinj dhe të guximshëm për shërbim vullnetar në afatin ushtarak”, potencoi Nuredini.
Ai potencoi se sikur gjeneratat paraprake, edhe kjo gjeneratë do të ketë mundësi për zhvillim të mëtutjeshëm profesional në profesionin ushtarak dhe ta zgjedhin profesionin ushtarak si përcaktim jetësor.
Potencoi se mbajtja e uniformës së Armatës është krenari dhe privilegj, por gjithashtu edhe përgjegjësi, humanitet dhe viktimizim. Si shembull e përmendi aksidentin e autobusit në fshatin Llaskarcë ku katër ushtarë të Armatës, duke i zbatuar aftësitë dhe shkathtësitë e fituara, me guxim dhe mund personal në kohë e dhanë ndihmën gjatë tërheqjes së të pësuarve.
“Deri tani ushtarët tanë anën humane e kanë treguar edhe gjatë ballafaqimit me zjarret e pyjeve, përmbytjet dhe katastrofat tjera dhe ne jemi krenar që kemi pjesëtarë të tillë në Armatë”, potencon majori.
