Në rajonin e Stacionit Policor për mbikëqyrje kufitare “Bllacë” dje rreth orës 20:00 tek vendi “Terminal”, efektivët e policisë e kanë privuar nga liria F.D. (33) nga fshati Pustenik, Kosovë, për shkak të dyshimit se ka kryer veprën penale “prodhim i paautorizuar dhe lëshim në qarkullim të drogave narkotike, substancave psikotrope dhe prekursorëve.
Siç njoftojnë nga MPB, efektivët e policisë e kanë vërejtur personin si lëviz nga Kosova drejt Republikës së Maqedonisë së Veriut dhe gjatë kontrollit tek ai, në thasë janë gjetur 14 paketime me rreth 15 kilogramë marihuanë.
Personi është dorëzuar në Stacionin e Policisë në Bit Pazar për procedim të mëtutjeshëm, ndërsa droga është marrë dhe është dhënë për ekspertizë.
Pas dokumentimit të plotë të rastit, SPB Shkup – Njësiti për tregti ilegale me drogë dhe armë do të ngritë kallëzim penal.
