Bullgaria akuzohet për racizëm dhe diskriminim ndaj pakicës maqedonase

Maqedonia

Bullgaria akuzohet për racizëm dhe diskriminim ndaj pakicës maqedonase

Më: 25 qershor 2019 Në ora: 10:01
Maqedonia dhe Bullgaria

Në raportin e fundit nga monitorimi i Komisionit të Asamblesë Parlamentare të Këshillit të Evropës, në kuadër të monitorimit të post-dialogut me Bullgarinë, është konstatuar se Bullgaria ka racizëm dhe ka diskriminim ndaj pakicës maqedonase në këtë vend.

Shoqatat e maqedonasve në Bullgari për këtë kërkojnë reagimin e autoriteteve të Maqedonisë, duke pasur parasysh edhe marrëveshjen e nënshkruar mes dy vendeve për fqinjësi të mirë.

“Në diskursin politik ekziston gjuhë raciste dhe jotoleruese ndaj romëve, myslimanëve, hebrenjve, turqve dhe maqedonasve. Ky vazhdon të jetë problem serioz në Bullgari. Autoritetet bullgare duhet të bëjnë përpjekje serioze për dënimin sistematik dhe të pakusht të gjuhës së urrejtjes, duke përfshirë edhe zbatimin e rekomandimeve nga raporti i fundit i Komisionit Evropian Kundër Racizmit dhe Jotolerancës për Bullgarinë”.

“Shqetëson edhe marrëdhënia ndaj pakicës maqedonase, e cila nuk është e pranuar nga autoritetet bullgare për shkak të zbatimit rigoroz të kritereve formale, edhe pse ky grup vazhdimisht shpreh nevojën për mbrojtje sipas Konventës kornizë”.

“Maqedonasit nuk janë të përfshirë në programet që kanë të bëjnë me bashkësitë etnike dhe nuk marrin asnjë ndihmë nga shteti për ruajtjen dhe zhvillimin kulturës dhe identitetit të tyre. Në shkolla nuk mësohet gjuha maqedonase ose historia. Nuk është e regjistruar asnjë organizatë ose parti maqedonase. Bashkëbiseduesit tanë thonë se ka diskriminim kundër anëtarëve të komunitetit maqedonas”, thuhet në raport.

Maqedonasit në Bullgari kërkojnë reagimin e autoriteteve maqedonase dhe pyesin nëse sjellja e Bullgarisë është në frymën e marrëdhënieve fqinjësore.

commentFirst article
Sot mund të lexoni Shfletoni kopertinat