Nëpërmjet një njoftimi të partisë maqedonase në pushtet LSDM thuhet se “në vend se të tregojnë nëse do të përkrahin kërkesën për interpretim autentik të nenit 11 të Ligjit për falje, OBRM-PDUKM vazhdon me propozime të papërgjegjshme që janë në funksion të ikjes së drejtësisë”.
“Igor Janushev dhe Hristijan Mickoski t’u bëjnë thirrje deputetëve të përkrahin kërkesën për interpretim autentik të ngritur nga LSDM”, shprehen nga LSDM.
Sipas tyre, duhet një herë e përgjithmonë të përmbyllet amnistia e Ivanov dhe secili që ka shkelur ligjin duhet të përgjigjet para ligjeve ndërsa të gjitha lëndët dhe hetimet e nisura duhet të përfundojnë.
“Propozimi i Mickoskit dhe partisë së tij do të thotë se të gjithë nga OBRM-PDUKM që për 11 vite kanë vjedhur duhet të amnistohen, të mos marrin përgjegjësi, dhe më pastaj t’u ndalohet të merren me politikë. Kjo është e turpshme dhe joserioze”, thonë nga LSDM duke thënë se duhet të përmbyllet amnistia e Ivanov dhe më pastaj të bisedohet për propozimet tjera.
