Kryetari i Kuvendit të Maqedonisë së Veriut Talat Xhaferi, priti sot në një takim ambasadorin e Shqipërisë në Shkup Fatos Reka, me të cilin kanë biseduar për marrëdhëniet ndërshtetërore dhe vazhdimin dhe thellimin e këtij bashkëpunimi në të ardhmen.
Ambasadori Reka tha se zgjedhjet e fundit e konfirmuan rëndësinë dhe kapacitetin demokratik të qytetarëve të Maqedonisë së Veriut.
Ndërsa, kryetari Xhaferi tha se marrëdhëniet ndërmjet dy vendeve janë në nivel të lartë, me dialog intensiv politik në nivele të ndryshme dhe bashkëpunim në numër të konsiderueshëm të fushave me interes të ndërsjellë.
Ai tha se bashkëpunimi do të vazhdojë edhe gjatë këtij mandati, dhe se së shpejti pritet formimi i grupit për bashkëpunim me Parlamentin e Shqipërisë, me çka do të vazhdojë bashkëpunimi i vendosur i afërt me grupin e bashkëpunimit në parlamentin shqiptar.
