Qeveria e Maqedonisë së Veriut në seancën e sotme ka miratuar 99-të projekte infrastrukturore për 75 komunat e ndryshme në vend. Siç njoftojnë nga Qeveria, në këtë seancë gjithashtu janë ndarë 30 milionë denarë mjete të pakthyeshme për Komunën e Haraçinës.
Qeveria bëri të ditur se për këto 99 projekte janë ndarë 35 milionë euro, që do të shpenzohen kryesisht për rindërtimin e rrugëve lokale, ujësjellës, kanalizim, çerdhe, shkolla, objekte sportive, shëndetësore dhe projektet tjera të propozuara nga Komuna.
“Në seancën e sotme u miratua Vendimi për ndarjen e mjeteve nga Buxheti i RMV-së për vitin 2020 në vlerë prej 30.000.000 denarë për Komunën e Haraçinës, si mjete financiare të pakthyeshme për menaxhimin e pasojave të shkaktuara nga kriza Covid-19”, njoftojnë nga Qeveria.
Qeveria sot gjithashtu miratoi edhe pakon e katër për masat kundër pasojave të shkaktuara nga Covid-19.
